സാനിയ മിർസ തന്റെ കരിയർ അവസാനിപ്പിച്ചത് തോൽവിയൊടെയാണെങ്കിലും തല ഉയർത്തി തന്നെയാണ് സാനിയയുടെ മടക്കം. സ്വപ്‌നമായിരുന്ന പലതും നേടിയെടുത്താണ് ഇന്ത്യൻ താരം ടെന്നീസ് കരിയർ അവസാനിപ്പിച്ചത്. ലളിതവും സുന്ദരവുമായിരുന്നു സാനിയയുടെ വിരമിക്കൽ മത്സരം.
സഹതാരം മാഡിസൺ കീസിനെ ചേർത്ത് പിടിച്ച് ആശ്ലേഷിച്ചായിരുന്നു തന്റെ കരിയർ ഔദ്യോഗികമായി അവസാനിപ്പിച്ചത്. വിരമിക്കൽ ചാംപ്യൻഷിപ്പായ ദുബായ് ഓപ്പണിൽ യുഎസ് താരം മാഡിസൺ കീസിനൊപ്പം വനിതാ ഡബിൾസിൽ ഇറങ്ങിയ സാനിയ റഷ്യൻ കൂട്ടുകെട്ടായ വെറോണിക്ക കുദെർമെറ്റോവല്യുഡ്മില സാംസനോവ എന്നിവർക്കു മുന്നിൽ നേരിട്ടുള്ള സെറ്റുകൾക്കാണ് പരാജയപ്പെട്ടത്.
ജനുവരിയിൽ തന്നെ വിരമിക്കൽ സൂചന സാനിയ നൽകിയിരുന്നു.
ഓസ്ട്രേലിയൺ ഓപ്പണിന് ശേഷം നടക്കുന്ന ദുബായ് ഓപ്പണോടെ കരിയർ അവസാനിപ്പിക്കും എന്ന് താരം പറഞ്ഞിരുന്നു. മുപ്പത്തിയാറുകാരിയായ സാനിയ ഇന്ത്യൻ വനിത ടെന്നീസിന് പുതിയ ദിശാബോധമാണ് നൽകിയത്. 2003-ലാണ് പ്രൊഫഷണൽ ടെന്നിസിൽ താരം അരങ്ങേറ്റം കുറിച്ചത്. 2009ൽ 23-ാം വയസ്സിൽ മഹേഷ് ഭൂപതിക്കൊപ്പം ഓസ്‌ട്രേലിയൻ ഓപ്പൺ ടെന്നിസ് മിക്‌സ്ഡ് ഡബിൾസ് കിരീടം ചൂടിയാണ് സാനിയ മിർസ ഇന്ത്യൻ ആരാധകരുടെ മനസ്സിൽ ചേക്കേറിയത്. രണ്ട് പതിറ്റാണ്ടോളം നീണ്ട സാനിയയുടെ കരിയറിൽ ആറ് ഗ്രാൻസ്ലാം കിരീടമാണ് നേടിയിട്ടുള്ളത്. അത്യൂജ്ജലമായിരുന്നു സാനിയയുടെ കരിയർ. ഏഷ്യൻ ഗെയിംസിൽ രണ്ട് സ്വർണ്ണവും മൂന്ന് വീതം വെള്ളിയും വെങ്കലവും നേടിയിട്ടുണ്ട്. കോമൺ വെൽത്ത് ഗെയിംസ്, ആഫ്രോ- ഏഷ്യൻ ഗെയിംസ് എന്നിവയിൽ തിളക്കമാർന്ന നേട്ടമാണ് സാനിയ സ്വന്തമാക്കിയത്.
2010ൽ പാക് ക്രിക്കറ്റ് താരം ഷുഹൈബ് മാലിക്കിനെ വിവാഹം കഴിച്ചു. 2018-ൽ അമ്മയായതിന് ശേഷം കോർട്ടിൽ നിന്ന് വിട്ട് നിന്ന സാനിയ 2020-ൽ വീണ്ടും ടെന്നീസിൽ തിരിച്ചെത്തി. പത്മ ഭൂഷൺ, പത്മശ്രീ പുരസ്‌കാരങ്ങൾ, അർജജുന പുരസ്‌കാരം, ഖേൽ രത്‌ന പുരസ്‌കാരം എന്നിവയും സാനിയയ്‌ക്ക് ലഭിച്ചിട്ടുണ്ട്.
Comments