വിൽപനയിൽ പുതിയ നാഴികക്കല്ലുകൾ തീർത്ത് ടാറ്റ മോട്ടോഴ്‌സ്: ഒറ്റകുതിപ്പിൽ 50 ലക്ഷം കാറുകൾ വിറ്റ് ടാറ്റ; പൊടിപൊടിച്ച് ആഘോഷം

50 ലക്ഷം കാറുകളുടെ വിൽപന നടത്തി ടാറ്റ മോട്ടോഴ്‌സ്. 1998 ൽ പാസഞ്ചർ കാർ വിപണിയിലേക്ക് കാലെടുത്ത് വച്ച ടാറ്റ മോട്ടോഴ്സ് 2004 ൽ 10 ലക്ഷം കാറുകളുടെ വിൽപനയും 2010 ല്‍ 20 ലക്ഷം വിൽപനയും 2015 ൽ 30 ലക്ഷം വിൽപനയും 2020 ൽ 40 ലക്ഷം വിൽപനയും കൈവരിച്ചു. അടുത്ത പത്തു ലക്ഷം കാർ വിൽപന നേടാൻ മൂന്നു വർഷം മാത്രമേ ടാറ്റ എടുത്തുള്ളു എന്നതും ശ്രദ്ധേയമാണ്.

ഈ വിജയത്തോടെ ടാറ്റാ മോട്ടോഴ്സ്, ഇലക്ട്രിക് വാഹന നിർമ്മാണ രംഗത്ത് പുത്തൻ ചുവടുവെപ്പായിരിക്കുകയാണ്. വിവിധ സെഗ്‌മെന്റുകളിലുടനീളം പുതിയ മോഡലുകളുടെ വരവാണ് ഈ നേട്ടങ്ങൾക്കെല്ലാം പിന്നിൽ പ്രവർത്തിച്ച പ്രധാന കാരണം എന്ന് കമ്പനി പറയുന്നു. ഈ വിജയം ആഘോഷിക്കുന്നതിനായി, ടാറ്റ മോട്ടോഴ്‌സ് രാജ്യത്തുടനീളമുള്ള ഉപഭോക്താക്കൾക്കും ജീവനക്കാർക്കുമായി ഒരു ആഘോഷ പ്രചാരണം നടത്തും. നിർമ്മാണ സ്ഥലങ്ങളിലും പ്രാദേശിക ഓഫീസുകളിലും ഒരു മാസം നീണ്ടുനിൽക്കുന്ന ആഘോഷങ്ങൾ ഉണ്ടായിരിക്കുമെന്നും കമ്പനി അറിയിച്ചു.

അതേസമയം ഇലക്ട്രിക് വാഹന വിപണിയിലെ ഒന്നാമനാണ് ടാറ്റ മോട്ടോഴ്സ്. രാജ്യത്തെ ഏറ്റവും കുറഞ്ഞ വിലയുള്ള ഇലക്ട്രിക് കാർ ടിയാഗോ ഇവി അടുത്തിടെയാണ് ടാറ്റ പുറത്തിറക്കിയത്. ഇതുകൂടാതെ ഇന്ത്യയിൽ ഏറ്റവും അധികം വിൽപനയുള്ള ഇലക്ട്രിക് കാറായ നെക്സോൺ ഇവിയും ടിഗോർ ഇവിയും ടാറ്റയുടെ ഇലക്ട്രിക് ലൈനപ്പിലുണ്ട്.