ഹോളി ആഘോഷത്തിന് മുൻപ് ഇക്കാര്യങ്ങൾ കൂടി അറിയുക

നിറങ്ങളുടെ ഉത്സവമായ ഹോളി തൊട്ടടുത്തെത്തിയിരിക്കുന്നു. ഒത്തുചേരലിന്റെ ആഘോഷം കൂടിയായ ഹോളി ആഘോഷത്തിൽ നമ്മൾ ശ്രദ്ധിക്കേണ്ട നിരവധി കാര്യങ്ങളുണ്ട്. ഓരോരുത്തരുടെയും ആരോഗ്യം, ചർമ്മ സംരക്ഷണം, കണ്ണുകൾ എന്നിവയിൽ പ്രത്യേക ശ്രദ്ധകൊടുക്കേണ്ടതുണ്ട്. വിപണിയിൽ വിൽക്കുന്ന ഹോളി നിറങ്ങളിൽ ഭൂരിഭാഗവും മെർക്കുറി, ആസ്ബറ്റോസ്, സിലിക്ക, മൈക്ക, ലെഡ് തുടങ്ങിയ അപകടകരമായ രാസവസ്തുക്കൾ അടങ്ങിയിരിക്കാം. ഇത് ചർമ്മത്തിനും കണ്ണുകൾക്കും വളരെ ദോഷകരമാണ്.

കണ്ണിന് ചുമപ്പ്, അലർജി തുടങ്ങിയ പ്രശനങ്ങൾ ഉണ്ടാക്കുന്നു. ഇവ കാഴ്ച നഷ്ടമാകുന്നതിനുവരെ കാരണമായേക്കാം. ഇത്തരം കെമിക്കൽ നിറങ്ങൾക്ക് പകരം മഞ്ഞൾ, വേപ്പ്, ചന്ദനം, പൂക്കൾ തുടങ്ങിയ പ്രകൃതിദത്ത ചേരുവകൾ ഉപയോഗിച്ച് നിർമ്മിച്ച പരമ്പരാഗത പ്രകൃതിദത്ത നിറങ്ങൾ ഉപയോഗിക്കുക.

ഹോളി ആഘോഷങ്ങൾക്ക് മുൻപ് മുഖത്തും കണ്ണുകൾക്ക് ചുറ്റും ഫേസ് ക്രീം അല്ലെങ്കിൽ വെളിച്ചെണ്ണ പുരട്ടുക. ഇത് നിറങ്ങൾ കണ്ണിലേക്ക് കടക്കുന്നത് തടയാൻ സഹായിക്കും. അഥാവാ നിറപ്പൊടികൾ കണ്ണിനുള്ളിൽ പടർന്നാൽ പരമാവധി കണ്ണുകൾ തിരുമാതിരിക്കുക. അതുപോലെ മുഖത്തും കണ്ണുകളിലും തൊടുന്നത് ഒഴിവാക്കുക. കൂടാതെ കൈകളിലെ നിറങ്ങൾ കഴുകിക്കളയാതെ കണ്ണിലും മുഖത്തും തൊടാതിരിക്കുക. കൈകളിലെ നിറം കണ്ണിനുള്ളിലേക്ക് പടരാം, ഇത് അണുബാധക്ക് കാരണമാകും. നിറങ്ങൾ പറ്റിയിരിക്കുന്ന കൈകൾ ഉപയോഗിച്ച് കണ്ണുകൾ തിരുമ്മുന്നത് കോർണിയ അബ്രാസിഷൻ അല്ലെങ്കിൽ കോർണിയയിൽ പോറൽ ഉണ്ടാക്കിയേക്കാം.

ഹോളി ആഘോഷത്തിന് ശേഷം കണ്ണുകൾ തണുത്ത വെള്ളം ഉപയോഗിച്ച് നന്നായി വൃത്തിയാക്കുക. ശേഷം നേത്ര സംരക്ഷണത്തിന് ഉതകുന്ന ഐ ഡ്രോപ്പുകൾ ഉപയോഗിക്കാവുന്നതാണ്. ഐ ഡ്രോപ്പുകൾ ഉപയോഗിച്ച് കണ്ണുകൾ ലൂബ്രിക്കേറ്റ് ചെയ്യുന്നത് നല്ലതാണ്. കൂടാതെ ദീർഘനേരം തണുത്ത വെള്ളംകൊണ്ട് കണ്ണുകൾ കഴുകുന്നത് കണ്ണുകൾക്ക് ആശ്വാസം നൽകും. കണ്ണിനുള്ളിൽ പറ്റിയിരിക്കുന്ന നിറങ്ങൾ നീക്കം ചെയ്യാനും സഹായിക്കും. ഇത്രയും മാർഗ്ഗങ്ങൾ ചെയ്ത ശേഷവും കണ്ണിനുള്ളിൽ ബുദ്ധിമുട്ട് അനുഭവപ്പെട്ടാൽ ഉടൻ തന്നെ ഒരു നേത്രരോഗവിദഗ്‌ദ്ധനെ സമീപിക്കുക.