പ്രധാനമന്ത്രി നരേന്ദ്രമോദിയുടെ ഭരണത്തിൽ പൂർണ്ണ തൃപ്ത; തിരഞ്ഞെടുപ്പിൽ പിന്തുണ ബി ജെ പിക്ക്; സുമലത അംബരീഷ്

ബെംഗളൂരു: കേന്ദ്രസർക്കാരിന്റെ ഭരണത്തിൽ താൻ പൂർണ്ണ തൃപ്തയെന്ന് നടിയും മാണ്ഡ്യ ലോക്‌സഭാ എംപിയുമായ സുമലത അംബരീഷ്. വരുന്ന തിരഞ്ഞെടുപ്പിൽ പ്രധാനമന്ത്രി നരേന്ദ്രമോദിക്ക് പിൻതുണ നൽകുമെന്നും സുമലത പറഞ്ഞു. നിലവിൽ മാണ്ഡ്യയിൽ നിന്നുള്ള സ്വതന്ത്ര എംപിയാണ് സുമലത.

ജെഡിഎസ്സിന്റെ കേന്ദ്രത്തിൽ കുമാരസ്വാമിയുടെ മകൻ നിഖിൽ കുമാര സ്വാമിയെ തോൽപ്പിച്ചാണ് സുമലത ലോക്‌സഭാ തെരഞ്ഞെടുപ്പിൽ വിജയിച്ചത്. 2018-ൽ മാണ്ഡ്യയിലെ എല്ലാ മണ്ഡലങ്ങളിൽ നിന്നും ജയിച്ചത് ജെഡിഎസ്സാണ്.

പ്രധാനമന്ത്രി മോദിയുടെ നേതൃത്വത്തിൽ താൻ വിശ്വസിക്കുന്നുവെന്നും, അദ്ദേഹത്തിന്റെ നേതൃത്വത്തിൽ രാഷ്‌ട്രം വലിയ ഉയരങ്ങളിൽ എത്തിയിരിക്കുന്നു വെന്നും സുമലത പറഞ്ഞു. കൂടാതെ മുഖ്യമന്ത്രി ബസവരാജ് ബൊമ്മൈയുടെയുംബിഎസ് യെദ്യൂരപ്പയുടെയും പ്രവർത്തനങ്ങളും താൻ ഇഷ്ടപ്പെടുന്നുണ്ടെന്നും സുമലത വ്യക്തമാക്കി.

മെയ് മാസത്തോടെ നടക്കുന്ന കർണ്ണാടക നിയമസഭാ തെരഞ്ഞെടുപ്പിൽ മാണ്ഡ്യ ജില്ലയിലെ ഏതെങ്കിലും ഒരു മണ്ഡലത്തിൽ സുമലത മത്സരിക്കുമെന്നും സൂചനകൾ ഉണ്ട്. സിനിമാ രംഗത്ത് സജീവമായിരുന്ന സുമലത ഭർത്താവിന്റെ മരണത്തോടെയാണ് രാഷ്‌ട്രീയത്തിൽ സജീവമായത്. 2019ൽ നടന്ന ലോക്‌സഭ തെരഞ്ഞെടുപ്പിൽ മാണ്ഡ്യയിൽ നിന്ന് 1,25,876 വോട്ടുകൾക്കാണ് സുമലത വിജയിച്ചത്. അന്ന് ദേശീയ ശ്രദ്ധയാകർഷിച്ച മണ്ഡലമായിരുന്നു മാണ്ഡ്യ. നിലവിൽ മാണ്ഡ്യയുടെ പുരോഗമനമാണ് തന്റെ മനസ്സിലെന്നും സുമലത വ്യക്തമാക്കി. മാർച്ച് 12-ന് പ്രധാനമന്ത്രി മാണ്ഡ്യ സന്ദർശിക്കുന്നുണ്ട്.