വാഷിംഗ്ടൺ: റഷ്യൻ യുദ്ധവിമാനവും യുഎസിന്റെ ഡ്രോണും കരിങ്കടലിനു മുകളിൽ കൂട്ടിയിടിച്ചുണ്ടായ അപകടത്തിൽ റഷ്യയുടെ പങ്ക് തെളിയിക്കുന്ന ദൃശ്യങ്ങൾ പുറത്ത് വിട്ട് പെന്റഗൺ. 45 സെക്കൻ് ദൈർഘ്യമുള്ള വീഡിയോയിൽ റഷ്യൻ യുദ്ധ വിമാനം യുഎസിന്റെ ഡ്രോണിന്റെ പിന്നിലേക്ക് അടുക്കുന്നതും അത് കടന്നുപോകുമ്പോൾ യുദ്ധവിമാനം ഇന്ധനം ഒഴിക്കുകയും ചെയ്യുന്നതിന്റെ ദൃശ്യങ്ങളാണ് പെന്റഗൺ പുറത്ത് വിട്ടിരിക്കുന്നത്.
കഴിഞ്ഞ ദിവസം റഷ്യൻ യുദ്ധവിമാനവും യുഎസിന്റെ ഡ്രോണും കരിങ്കടലിനു മുകളിൽ കൂട്ടിയിടിച്ചാണ് അപകടം ഉണ്ടായത്. റഷ്യയുടെ സുഖോയ് 27 യുദ്ധവിമാനവും യുഎസിന്റെ എംക്യു9 റീപ്പർ ഡ്രോണുമാണ് കൂട്ടിയിടിച്ചത്.
രാജ്യാന്തര വ്യോമ മേഖലയിൽ തങ്ങളുടെ എംക്യു9 വിമാനം പതിവ് പരിശോധനകൾ നടത്തുകയായിരുന്നുവെന്നും റഷ്യൻ വിമാനം ഇടിക്കുകയുമായിരുന്നെന്നും യുഎസ് സൈന്യം നേരത്തെ അറിയിച്ചിരുന്നു. എംക്യു9 റീപ്പർ ഡ്രോണിന് കാര്യമായ തകരാർ സംഭവിച്ചിട്ടുണ്ട്. അപകടത്തെ തുടർന്ന് അമേരിക്കൻ പ്രതിരോധ സെക്രട്ടറി ലോയ്ഡ് ഓസ്റ്റിനും ജോയിന്റ് ചീഫ്സ് ഓഫ് സ്റ്റാഫ് ചെയർമാൻ ജനറൽ മാർക്ക് മില്ലിയും റഷ്യൻ അധികാരികളുമായി ചർച്ചചെയ്തു.
