സ്വപ്‌ന സുരേഷിനെതിരായ വധഭീഷണി; പോലീസിന് മുന്നിൽ ഹാജരാകുമെന്ന് വിജേഷ് പിള്ള

തിരുവനന്തപുരം: സ്വപ്‌ന സുരേഷിനെതിരായ വധഭീഷണി കേസിൽ പോലീസിന് മുന്നിൽ ഹാജരാകാൻ വിജേഷ് പിള്ള. ബെംഗളൂരു കെആർ പുര പോലീസ് സ്‌റ്റേഷനിലാകും അഭിഭാഷകനൊപ്പം വിജേഷ് പിള്ള എത്തുക. തനിക്ക് സമൻസ് കിട്ടിയിട്ടില്ലെന്നും എന്നാൽ പോലീസ് സ്‌റ്റേഷനുമായി അഭിഭാഷകൻ ബന്ധപ്പെട്ടതിന്റെ അടിസ്ഥാനത്തിലാണ് ഹാജരാകുന്നതെന്നും അദ്ദേഹം വ്യക്തമാക്കി.

ഇന്ത്യൻ ശിക്ഷാ നിയമത്തിലെ 506 വകുപ്പ് ചുമത്തിയാണ് ബെംഗളൂരു കൃഷ്ണരാജ പുര പോലീസ് വിജേഷ് പിള്ളയ്‌ക്കെതിരെ കേസെടുത്തിരിക്കുന്നത്. നേരിട്ട് ഹാജരാകാൻ നിർദേശിച്ച് വാട്‌സ്ആപ് വഴി സമൻസ് അയച്ചിരുന്നു. ഇതിനിടെ വിജേഷ് പിള്ളയെ ഫോണിൽ ബന്ധപ്പെടാൻ സാധിക്കുന്നില്ലെന്നും ഫോൺ സ്വിച്ച് ഓഫ് ആണെന്നും പോലീസ് അറിയിച്ചു. തുടർന്ന് ഇയാൾ ഒളിവിലാണെന്ന് പോലീസ് സംശയിക്കുകയായിരുന്നു.

സിപിഎം സംസ്ഥാന സെക്രട്ടറിയ്‌ക്ക് വേണ്ടി എന്ന പേരിൽ തന്നെ വിജേഷ് ഭീഷണിപ്പെടുത്തിയെന്നാണ് സ്വപ്ന ആരോപിക്കുന്നത്. 30 കോടി രൂപ നൽകാമെന്നും കൈയിലുള്ള തെളിവുകൾ നശിപ്പിച്ച് കുടുംബത്തോടൊപ്പം നാടുവിടണമെന്നുമാണ് സ്വപ്നയോട് വിജേഷ് ആവശ്യപ്പെട്ടതെന്നും സ്വപ്ന ആരോപിച്ചിരുന്നു. ഇതിന് പിന്നാലെയാണ് ഇവർ പോലീസിൽ പരാതി നൽകിയതും കേസെടുത്തതും. എന്നാൽ ഇതിനിടെ വിജേഷ് സ്വപ്നയ്‌ക്കെതിരെ കേരളത്തിൽ മാനനഷ്ടക്കേസ് നൽകി. സംഭവത്തിൽ ക്രൈം ബ്രാഞ്ച് എഫ്‌ഐആർ രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്.