ഉത്തരേന്ത്യ-ദക്ഷിണേന്ത്യ വേർതിരിവില്ല; ഇന്ത്യൻ സംസ്‌കാരവും ഭാരതീയതയും പാരമ്പര്യവുമുള്ള സിനിമകൾ അംഗീകരിക്കപ്പെടുമെന്നും അമിത് ഷാ

ഇന്ത്യൻ സിനിമകളിൽ ഉത്തരേന്ത്യ-ദക്ഷിണേന്ത്യ വേർതിരിവില്ലെന്ന് വ്യക്തമാക്കി കേന്ദ്ര ആഭ്യന്തരമന്ത്രി അമിത് ഷാ. ഇന്ത്യൻ പാരമ്പര്യവും സംസ്‌കാരവും ഉയർത്തിപിടിക്കുന്ന സിനിമകൾ എല്ലാവരും ഹൃദയം കൊണ്ട് അംഗീകരിക്കുമെന്നും അദ്ദേഹം കൂട്ടിച്ചേർത്തു. ആർആർആറിന് ഓസ്‌കാർ ലഭിച്ചതുമായി ബന്ധപ്പെട്ട വിഷയങ്ങളിലാണ് അദ്ദേഹത്തിന്റെ പ്രതികരണം.

ഇന്ത്യയിൽ ആർക്ക് ഓസ്‌കാർ ലഭിച്ചാലും അത് അഭിമാനകരമായ കാര്യമാണ്. സിനിമകൾ അഭിനിവേശത്തോടെ കാണാറുള്ള ആളാണ് താൻ. ദക്ഷിണേന്ത്യയിലും നല്ല സിനിമകൾ ഒരുപാട് പുറത്തിറങ്ങുന്നുണ്ട്. പലതും മികച്ച പ്രകടനമാണ് കാഴ്ചവെയ്‌ക്കുന്നത്. ഈയൊരു ട്രെൻഡ് താൻ ശ്രദ്ധിച്ചിട്ടുണ്ട്. ഇന്ത്യൻ സംസ്‌കാരവും പാരമ്പര്യവും ഭാരതീയതയും പറയുന്ന സിനിമകൾക്ക് ഇപ്പോൾ കൂടുതൽ സ്വീകാര്യത ലഭിക്കുന്നുണ്ടെന്നും അമിത് ഷാ പറഞ്ഞു.

ഒരു ദേശീയ മാദ്ധ്യമം സംഘടിപ്പിച്ച കോൺക്ലേവിൽ പങ്കെടുത്ത് സംസാരിക്കുമ്പോഴായിരുന്നു അദ്ദേഹത്തിന്റെ പ്രതികരണം.