മിണ്ടാപ്രാണികൾക്ക് ആഹാരം നൽകിയാൽ പുണ്യം ലഭിക്കുമെന്നാണ് പഴമക്കാർ പറഞ്ഞിരുന്നത്. എന്നാൽ കാലം മാറി! പൊതുസ്ഥലത്ത് പ്രാവിന് തീറ്റ കൊടുത്തയാൾക്ക് 15,000 രൂപ പിഴ. ഇംഗ്ലണ്ടിലെ ലൂട്ടണിനെ സെന്റ് ജോർജ്‌സ് സ്‌ക്വയറിലാണ് സംഭവം. നഗരത്തിന്റെ ഹൃദയഭാഗത്തായിട്ടാണ് ഈ സ്വകയർ സ്ഥിതി ചെയ്യുന്നത്. ഇവിടെ പ്രാവിന് തീറ്റ കൊടുക്കുന്നത് കൂടുതൽ പ്രാവുകളെ ആകർഷിക്കുമെന്ന് മാത്രമല്ല, മറ്റ് ജീവികളെയും പ്രാണികളെയും വരുത്തുമെന്ന് ചൂണ്ടിക്കാട്ടിയാണ് 150 പൗണ്ട് പിഴ ഈടാക്കിയത്.
നഗരത്തിൽ മാലിന്യങ്ങൾ കൈകാര്യം ചെയ്യാൻ തങ്ങൾ പ്രതിജ്ഞാബദ്ധമാണെന്നും പ്രാവുകൾക്ക് ഭക്ഷണം നൽകുന്നത് ഉൾപ്പെടെ മാലിന്യം വലിച്ചെറിയപ്പെടാനുള്ള സാഹചര്യങ്ങൾ സൃഷ്ടിക്കുന്നവർക്കെതിരെ പിഴ ചുമത്തുമെന്നും ലൂട്ടൺ കൗൺസിൽ അറിയിച്ചു. നിരീക്ഷണത്തിന് പ്രത്യേക പട്രോളിംഗ് സംഘത്തെ ഏർപ്പെടുത്തിയിട്ടുണ്ട്.
അധികൃതരുടെ നടപടിയെ അനുകൂലിച്ചും പ്രതികൂലിച്ചും നിരവധി പേരാണ് സമൂഹമാദ്ധ്യമങ്ങളിലൂടെ പ്രതികരണമറിയിച്ചത്. 2021-ലാണ് അധികൃതർ പിഴ തുക വർദ്ധിപ്പിച്ചത്.
Comments