ഹിന്ദുത്വം നുണകളാൽ കെട്ടിപ്പടുത്തതെന്ന പരാമർശം; നടൻ ചേതൻ കുമാർ അറസ്റ്റിൽ; വിദ്വേഷ ട്വീറ്റിനെതിരെ വിമർശനം രൂക്ഷം

ബെംഗളൂരു: ഹിന്ദുത്വത്തെക്കുറിച്ച് വിദ്വേഷകരമായ പരാമർശം നടത്തിയതിന് പിന്നാലെ കന്നഡ നടൻ ചേതൻ കുമാറിനെ അറസ്റ്റ് ചെയ്ത് പോലീസ്. ഹിന്ദുത്വ എന്ന ആശയം നുണകളാൽ കെട്ടിപ്പടുത്തതാണെന്ന നടന്റെ പരാമർശം വിശ്വാസികളുടെ വികാരത്തെ വ്രണപ്പെടുത്തുന്നതാണെന്ന പരാതിയുടെ അടിസ്ഥാനത്തിലാണ് ചേതൻ കുമാറിനെ ബെംഗളൂരു പോലീസ് അറസ്റ്റ് ചെയ്തത്.

മതത്തെയും മതവിശ്വാസത്തയും അപമാനിച്ചുവെന്നും ജനങ്ങൾക്കിടയിൽ ശത്രുതാ മനോഭാവം വർദ്ധിപ്പിക്കുന്ന തരത്തിലുള്ള പരാമർശം നടത്തിയെന്നുമാണ് നടനെതിരായ കേസ്. മാർച്ച് 20ന് ട്വിറ്ററിലൂടെയായിരുന്നു നടൻ വിവാദ പരാമർശം നടത്തിയത്. നിലവിൽ അറസ്റ്റിലായ ചേതൻ, ഷേഷാദ്രിപുരം പോലീസിന്റെ കസ്റ്റഡിയിൽ തുടരുകയാണ്. പ്രതിയെ ജില്ലാ കോടതിയിൽ ഹാജരാക്കിയെന്ന് പോലീസ് അറിയിച്ചു.

Hindutva is built on LIES

Savarkar: Indian ‘nation’ began when Rama defeated Ravana & returned to Ayodhya —> a lie

1992: Babri Masjid is ‘birthplace of Rama’ —> a lie

2023: Urigowda-Nanjegowda are ‘killers’ of Tipu—> a lie

Hindutva can be defeated by TRUTH—> truth is EQUALITY

— Chetan Kumar Ahimsa / ಚೇತನ್ ಅಹಿಂಸಾ (@ChetanAhimsa) March 20, 2023

നുണകളാൽ കെട്ടിപ്പടുത്ത ഹിന്ദുത്വത്തെ സത്യത്താൽ മാത്രമേ പരാജയപ്പെടുത്താൻ കഴിയൂവെന്നും താരം ട്വിറ്ററിൽ കുറിച്ചിരുന്നു. എന്നാൽ മണിക്കൂറുകൾക്കുള്ളിൽ തന്നെ നടനെതിരെ അനേകം പരാതികൾ ഉയർന്നു. തുടർന്ന് എഫ്‌ഐആർ രജിസ്റ്റർ ചെയ്ത പോലീസ് നടന്റെ അറസ്റ്റ് രേഖപ്പെടുത്തുകയും ചെയ്തു. ഇതാദ്യമായല്ല ചേതനെതിരെ പരാതി ഉയരുന്നത്. 2022 ഫെബ്രുവരിയിൽ ഹിജാബ് കേസിൽ വാദം കേൾക്കുകയായിരുന്ന കർണാടക ഹൈക്കോടതി ജസ്റ്റിസ് കൃഷ്ണ ദീക്ഷിതിനെതിരെ ആക്ഷേപകരമായ പരാമർശം നടത്തിയതിന് നടനെ അറസ്റ്റ് ചെയ്തിരുന്നു.