കാസർകോഡ് : ഒളിമ്പിക് അസോസിയേഷൻ പ്രസിഡന്റും രാജ്യസഭാംഗവുമായ പി.ടി ഉഷയ്ക്ക് കേന്ദ്ര സർവകലാശാലയുടെ ഓണററി ഡോകട്റേറ്റ്. കായികമേഖലയിലെ മഹത്തായ സംഭാവനകൾ പരിഗണിച്ചുകൊണ്ടാണ് ഡോക്ടറേറ്റ് നൽകുന്നതെന്ന് സർവകലാശാല അധികൃതർ അറിയിച്ചു.
കേന്ദ്ര സർവകലാശാല നൽകുന്ന പ്രഥമ ഓണററി ഡോക്ടറേറ്റാണത്. കായിക മേഖലയിലും പുതുതലമുറയിലെ കായിക താരങ്ങളുടെ കഴിവ് വാർത്തെടുക്കുന്നതിലും സമാനതകളില്ലാത്ത പ്രവർത്തനമാണ് പി.ടി ഉഷയുടേത് എന്നത് കണക്കിലാക്കിയാണ് അംഗീകാരം. 20 വർഷത്തോളമായി ഉഷ സ്കൂൾ ഓഫ് അത്ലറ്റിക്സ് എന്ന സ്ഥാപനം നടത്തുന്നുണ്ട്. ഇവിടുത്തെ കായിക താരങ്ങൾക്ക് നൽകുന്ന മികച്ച പരിശീലനം കൊണ്ട് അവരിലൂടെ ഇന്ത്യക്ക് ലഭിച്ചത് രാജ്യാന്തര മെഡലുകളാണ്.
രാജ്യത്തിന് പുതിയ കായിക സംസ്കാരത്തിന് അടിത്തറയിട്ട പ്രതിഭയാണ് പി.ടി ഉഷ. രാജ്യത്തിന് മാതൃകയാകുന്നവരെ ആദരിക്കേണ്ടത് സർവലാശാലയുടെ കർത്തവ്യമാണെന്ന് അധികൃതർ പറഞ്ഞു. കൂടാതെ പി.ടി ഉഷയുടെ ജീവിതവും നേട്ടങ്ങളും എക്കാലവും വിദ്യാർത്ഥികൾക്ക് പ്രചോദനകരമായിരിക്കുമെന്നും അധികൃതർ കൂട്ടിച്ചേർത്തു. സർവകലാശാലയിൽ സംഘടിപ്പിക്കുന്ന പ്രത്യേക പരിപാടിയിലായിരിക്കും ഡോക്ടറേറ്റ് സമ്മാനിക്കുക.
