എം. ശിവശങ്കർ മുഖ്യസൂത്രധാരൻ; കള്ളപ്പണ ഇടപാടിലൂടെ സ്‌പോൺസേർഡ് ഭീകരവാദത്തിനുള്ള ശ്രമം നടത്തി; നിർണായക കണ്ടെത്തലുകളുമായി ഇഡി

എറണാകുളം: ലൈഫ് മിഷൻ കേസിലെ മുഖ്യസൂത്രധാരൻ മുഖ്യമന്ത്രിയുടെ മുൻ പ്രിൻസിപ്പൽ സെക്രട്ടറി എം. ശിവശങ്കറെന്ന് ഇഡി. കള്ളപ്പണ ഇടപാടിലൂടെ സ്‌പോൺസേർഡ് ഭീകരവാദത്തിനുള്ള ശ്രമമാണ് പ്രതികൾ നടത്തിയതെന്നും ഇഡി വ്യക്തമാക്കി. സ്വപ്‌നയുടെ ലോക്കറിൽ നിന്ന് കിട്ടിയ പണം ശിവശങ്കറിന്റേതാണെന്നും ഇഡി കോടതിയിൽ പറഞ്ഞു. ഇത് സംബന്ധിച്ച മൊഴികൾ ചാർട്ടേഡ് അക്കൗണ്ടന്റ് വേണുഗോപാലും സ്വപ്‌ന സുരേഷും നൽകിയിട്ടുണ്ടെന്നും അറിയിച്ചു.

കള്ളപ്പണ ഇടപാടുമായി ബന്ധപ്പെട്ട കൂടുതൽ രേഖകൾ കണ്ടെത്താനുണ്ടെന്നും അതിനാർ ശിവശങ്കറിന് ജാമ്യം അനുവദിക്കരുതെന്നും ഇഡി പറഞ്ഞു. ആരോഗ്യപ്രശ്‌നങ്ങളെ മറയാക്കി അതിന്റെ പേരിൽ ജാമ്യം അനുവദിക്കണമെന്ന വാദം നിലനിൽക്കില്ലെന്നും ഇഡി കൂട്ടിച്ചേർത്തു. ഇതിന് മുൻപ് അറസ്റ്റിലായപ്പോഴും ആരോഗ്യപ്രശ്‌നങ്ങൽ പറഞ്ഞാണ് ശിവശങ്കർ ജാമ്യം നേടിയത്. അതിന് പിന്നാലെ ജോലിയിൽ പ്രവേശിക്കുന്ന സാഹചര്യമാണുണ്ടായത്. കേസിൽ വാദം നാളെയും തുടരും.

സ്വപ്‌നയുടെ ലോക്കറിൽ നിന്ന് ലഭിച്ച പണവുമായി ബന്ധപ്പെടുത്തി ശിവശങ്കറിനെ നേരത്തെ ചോദ്യം ചെയ്തിരുന്നതല്ലേയെന്നും ഇതേ ലോക്കറിനെ ബന്ധപ്പെടുത്തി എങ്ങനെയാണ് മറ്റൊരു കേസെടുക്കുന്നതെന്നും കോടതി ആരാഞ്ഞു. സ്വർണക്കള്ള കടത്തിലെ പണമിടപാട് അന്വേഷിച്ചപ്പോഴാണ് ലൈഫ് മിഷൻ അഴിമതി ബോധ്യപ്പെട്ടതെന്ന് അന്വേഷണസംഘം കോടതിയെ അറിയിച്ചു.