പ്രിയങ്ക ചോപ്ര ‘യഥാർത്ഥ ജീവിതത്തിലെ താരം’; നടിയെ പിന്തുണച്ച് വിവേക് അഗ്നിഹോത്രി

ബോളിവുഡിൽ നിന്ന് ഹോളിവുഡിൽ സജീവമായ നടിയാണ് പ്രിയങ്ക ചോപ്ര. നിലവിൽ ഹോളിവുഡിൽ സജീവമായ താരം ബോളിവുഡിൽ വളരെക്കുറച്ച് സിനിമകളാണ് ഇപ്പോൾ ചെയ്യുന്നത്. ബോളിവുഡിൽ സജീവമല്ലാത്തതിനെക്കുറിച്ചും എന്തുകൊണ്ടാണ് ബോളിവുഡ് വിട്ട് ഹോളിവുഡിലേക്ക് ചേക്കേറിയതെന്നും താരം പലവട്ടം തുറന്ന് പറഞ്ഞിരുന്നു. പ്രിയങ്കയുടെ ഈ തുറന്നുപറച്ചിലുകളാണ് ഇപ്പോൾ ചർച്ചയായിരിക്കുന്നത്.

ഇപ്പോഴിതാ പ്രിയങ്ക ചോപ്രയെ പിന്തുണച്ചുകൊണ്ട് രംഗത്തുവന്നിരിക്കുകയാണ് ദി കശ്മീർ ഫയൽസ് സംവിധായകൻ വിവേക് അഗ്നിഹോത്രി. ട്വിറ്ററിലൂടെയാണ് വിവേക് അഗ്നിഹോത്രി പ്രതികരിച്ചിരിക്കുന്നത്. ‘ഭീഷണിപ്പെടുത്തുന്ന സംഘത്തിന് മുന്നിൽ ചിലർ മുട്ടുകുത്തുന്നു, ചിലർ കീഴടങ്ങുന്നു, ചിലർ ഉപേക്ഷിച്ച് പോകുന്നു, ചിലർ മയക്കുമരുന്ന് കഴിക്കുന്നു, ചിലർക്ക് ജീവൻ നഷ്ടപ്പെട്ടു. ഈ ഭീഷണിപ്പെടുത്തുന്ന സംഘത്തിനെതിരെ, വളരെ ചുരുക്കം ചിലർ മാത്രമേ ഇവയെ എല്ലാം പ്രതിരോധിച്ച് വിജയത്തിന്റെ സ്വന്തം പ്രപഞ്ചം സൃഷ്ടിക്കൂ. അവരാണ് യഥാർത്ഥ ജീവിതത്തിലെ താരങ്ങൾ.’- എന്ന് അദ്ദേഹം കുറിച്ചു. ബോളിവുഡ് നടി കങ്കണ റണാവത്ത്, എഡിറ്റർ അപൂർവ അസ്രാണി, സംഗീതസംവിധായകൻ അമാൽ മല്ലിക് എന്നിവരും പ്രിയങ്ക ചോപ്ര തുറന്നുപറച്ചിലിനെ പിന്തുണച്ച് പ്രതികരണങ്ങൾ നടത്തിയിട്ടുണ്ട്.

ഹിന്ദി സിനിമാ മേഖലയിലെ പലരോടും തനിക്ക് അഭിപ്രായവ്യത്യാസം നിലനിന്നിരുന്നതായി പ്രിയങ്ക വെളിപ്പെടുത്തിയിരുന്നു. ബോളിവുഡിൽ ഒരു മൂലയിലേക്ക് തള്ളപ്പെട്ടു. തന്നെ സിനിമയിലേക്ക് വിളിക്കാത്ത ആളുകൾ ഉണ്ടായിരുന്നു. തനിക്ക് പലരോടും അഭിപ്രായ വ്യത്യാസങ്ങളുണ്ടായിരുന്നു. അത്തരമൊരു പൊളിറ്റിക്സ് തനിക്ക് മടുത്തു. ഇടവേള ആവശ്യമാണെന്ന് തോന്നി. അപ്പോഴാണ് സംഗീതം, ലോകത്തിന്റെ മറ്റൊരു ഭാഗത്തേക്ക് പോകാനുള്ള അവസരം തുറന്നു നൽകിയത്. അമേരിക്കയിൽ സംഗീത കരിയറിന് താത്പര്യമുണ്ടോയെന്ന് ചോദിച്ചത് അഞ്ജുല ആചാര്യയാണെന്ന് പ്രിയങ്ക ചോപ്ര പറഞ്ഞു.

തനിക്ക് ഇഷ്ടമില്ലാതിരുന്നിട്ടും ബോളിവുഡിൽ ജോലി ചെയ്ത കാലമുണ്ടായിരുന്നു. ഇന്ന് തനിക്ക് ലഭിക്കാത്ത സിനിമകൾക്കായി കൊതിക്കുന്നില്ല. സംഗീതത്തിലേക്ക് തിരിഞ്ഞപ്പോൾ അമേരിക്കയിലെത്തി. നല്ല ടീമിനൊപ്പം പ്രവർത്തിക്കാൻ കഴിഞ്ഞുവെന്നും പ്രിയങ്ക കൂട്ടിച്ചേർത്തു. താരത്തിന്റെ ഹോളിവുഡിലേക്കുള്ള ചുവടുമാറ്റം സംഗീതത്തിൽ മാത്രമായിരുന്നില്ല, എബിസി സീരീസായ ക്വാണ്ടിക്കോയിലും താരം അഭിനയിച്ചു.