നെറ്റ്ഫ്‌ലിക്‌സിലും താഴാതെ ‘തല’ ; നെറ്റ്ഫ്‌ലിക്‌സിൽ ഏറ്റവും കൂടുതൽ പേർ കണ്ട ചിത്രമായി തുനിവ്

2023ൽ ഏറ്റവും കൂടുതൽ പ്രേക്ഷകർ നെറ്റ്ഫ്‌ലിക്‌സിൽ കണ്ട ഇന്ത്യൻ ചിത്രമായി അജിത്തിന്റെ തുനിവ്. എച്ച് വിനോദും അജിത്തും വീണ്ടും ഒന്നിച്ച ചിത്രം ബോക്‌സ് ഓഫീസിലും വൻ വിജയമായിരുന്നു. വിജയ് ചിത്രം വാരിസിനൊപ്പം ക്ലാഷ് റിലീസ് ആയിരുന്നു ചിത്രം. എന്നാൽ വാരിസിനെ പിന്നിലാക്കി മുന്നേറുകയായിരുന്നു തുനിവ്. ലോകമെമ്പാടുമായി 200 കോടിയിൽ അധികം രൂപയാണ് ചിത്രം സ്വന്തമാക്കിയത്.

മലയാളത്തിന്റെ ലേഡി സൂപ്പർ സ്റ്റാർ മഞ്ജൂ വാര്യർ ആയിരുന്നു തലയുടെ നായികയായി എത്തിയത്. ആരാധകർ ഏറെ പ്രതീക്ഷയോടെ കാത്തിരുന്ന ചിത്രം കൂടി ആയിരുന്നു തുനിവ്. രശ്മിക മന്ദാന നായികയായെത്തിയ മിഷൻ മജ്‌നു പട്ടികയിൽ രണ്ടാം സ്ഥാനത്തുണ്ട്. വാത്തി, ആൻ ആക്ഷൻ ഹീറോ, സർക്കസ, വാൾടെയർ വീരയ്യ, കാന്താര, ഗാട്ട കുസ്തി, മിലി എന്നിവയാണ് ആദ്യ പത്തിൽ ഇടം നേടിയ മറ്റ് സിനിമകൾ.

ആദ്യ പത്തിൽ അഞ്ചിലധികവും തെന്നിന്ത്യൻ ചിത്രങ്ങളാണ്. തുനിവിന്റെ സ്വീകാര്യത അജിത്തിനെ പാൻ ഇന്ത്യൻ താരപദവിയിലേക്ക് എത്തിക്കുന്നു എന്നാണ് നിരൂപകർ വിലയിരുത്തുന്നത്. ഫെബ്രുവരി എട്ടിന് നെറ്റ്ഫ്‌ലിക്‌സിൽ സംപ്രേക്ഷണം ആരംഭിച്ച ചിത്രം രണ്ടാം ദിവസം മുതലെ ട്രെൻഡിങ് പട്ടികയിലായിരുന്നു.