ചെന്നൈ: സംസ്ഥാനത്ത് വിവിധ ജില്ലകളിൽ കൊറോണ ബാധ പടരുന്ന സാഹചര്യത്തിൽ പൊതുയിടങ്ങളിൽ മാസ്ക് നിർബന്ധമാക്കി തമിഴ്നാട് സർക്കാർ. തമിഴ്നാട്ടിലും പുതുച്ചേരിയിലുമാണ് പൊതുയിടങ്ങളിൽ സർക്കാർ മാസ്ക് നിർബന്ധമാക്കിയത്.
തമിഴ്നാട്ടിൽ കൊറോണ അനുദിനം വർദ്ധിക്കുന്നതിനാൽ തിയേറ്ററുകൾ, ഷോപ്പിങ് മാളുകൾ തുടങ്ങിയ തിരക്കേറിയ കേന്ദ്രങ്ങളിൽ മാസ്ക് ധരിക്കണമെന്ന് തമിഴ്നാട് പൊതുജനക്ഷേമ വകുപ്പ് ഡയറക്ടർ സെൽവ വിനായക് പ്രസ്താവനയിൽ അറിയിച്ചു.
അതേസമയം, കഴിഞ്ഞദിവസം തൂത്തുക്കുടി ഗവ. ആശുപത്രിയിൽ പാർഥിപൻ എന്നയാൾ കൊറോണ മൂലം മരിച്ചു. ഏതാനും ദിവസങ്ങൾക്ക് മുൻപ് തിരുച്ചിയിലും കൊറോണ മരണം റിപ്പോർട്ട് ചെയ്തതിന് പിന്നാലെയാണ് ഈ മരണം. കഴിഞ്ഞയാഴ്ച പുതുച്ചേരിയിലെ കാരയ്ക്കാലിലും കൊറോണ ബാധിച്ച് ഒരാൾ മരിച്ചിരുന്നു.
