പൂനൈ: ചുട്ടുപൊള്ളുന്ന വേനൽക്കാലത്തിനൊപ്പം ഇത് മാമ്പഴക്കാലവുമാണ്. ഈ സമയത്ത് ധാരാളം പഴങ്ങൾ കഴിക്കുന്നത് വളരെ നല്ലതാണ്. പക്ഷേ പഴവർഗ്ഗങ്ങൾക്ക് തൊട്ടാൽ പൊള്ളുന്ന വിലയും. എന്നാൽ ഇതിനെല്ലാം പരിഹാരവുമായി എത്തിയിരിക്കുകയാണ് പൂനെ സിംഹഗഡ് റോഡിലെ കച്ചവടക്കാരനായ ഗൗരവ് സനാസ്. സാദാരണക്കാർക്ക് ഈഎംഐ ആയി മാമ്പഴം ഇയാളുടെ പക്കൽനിന്നും വാങ്ങാവുന്നതാണ്.
മാമ്പഴങ്ങളുടെ രാജാവ് എന്നറിയപ്പെടുന്ന അൽഫോൻസാ മാമ്പഴമാണ് ഇഎംഐയിൽ ഇയാൾ വിൽക്കുന്നത്. വിപണിയിലെ അൽഫോൺസയുടെ നിരക്കനുസരിച്ച് സാധാരണക്കാർക്ക് വാങ്ങാൻ കഴിയാറില്ല. ഇത് സാധാരണക്കാരിലും എത്തിക്കാനാണ് സനാസ് ഈഎംഐ സമ്പ്രദായം ഏർപ്പെടുത്തിയിരിക്കുന്നത്. എന്നാൽ മാമ്പഴത്തിന് ഈഎംഐ നൽകുന്നതിനെ കുറിച്ച് സനാസ് പറയുന്നത് ഇങ്ങനെയാണ്. വീട്ടുപകരണങ്ങൾ ഈഎംഐ നിരക്കിൽ വാങ്ങാമെങ്കിൽ മാമ്പഴവും വാങ്ങാമെന്നാണ്.
ദേവഗഡ്, രത്നഗിരി എന്നിവിടങ്ങളിൽ നിന്നെത്തുന്ന അൽഫോൻസാ മാമ്പഴം ചില്ലറ വിൽപ്പനക്കാർ കിലോയ്ക്ക് 800 മുതൽ 1300 രൂപവരെയാണ് ഈടാക്കുന്നത്. ഈഎംഐ ആയി മാമ്പഴം വാങ്ങുന്നവർ ഡെബിറ്റ്, ക്രെഡിറ്റ് കാർഡുകൾ ഉപയോഗിച്ച് മാമ്പഴം വാങ്ങാവുന്നതാണ്.
