പ്രണയം തുടങ്ങിയത് ഇങ്ങനെ..; നയൻതാര ശ്രദ്ധയോടെ എന്നെ കേട്ടു: പ്രണയകഥ തുറന്നുപറഞ്ഞ് വിഘ്‌നേഷ് ശിവൻ

സിനിമാലോകത്ത് ഏറെ ആരാധകരുള്ള താരദമ്പതികളാണ് വിഘ്‌നേഷ് ശിവനും നയൻതാരയും. ഇവരുടെ വിശേഷങ്ങൾക്കായി സമൂഹമാദ്ധ്യമങ്ങൾ ഒന്നടങ്കമാണ് കാത്തിരിക്കുന്നത്. പ്രണയത്തെപ്പറ്റി അധികം തുറന്നു പറയാൻ താരങ്ങൾ തയ്യാറായിരുന്നില്ല. ഇപ്പോഴിതാ റൊമാന്റിക് ഹിറ്റ് ‘നാനും റൗഡി താൻ’ എന്ന ചിത്രത്തിന് വേണ്ടി നയൻതാരയെ ആദ്യമായി കണ്ട കഥയും തങ്ങളുടെ പ്രണയം തുടങ്ങിയതിനെപ്പറ്റിയും തുറന്നുപറയുകയാണ് വിഘ്‌നേഷ് ശിവൻ. ഒരു തമിഴ് മാദ്ധ്യമത്തിന് നൽകിയ അഭിമുഖത്തിലാണ് വിഘ്‌നേഷ് മനസ്സുതുറക്കുന്നത്.

ആദ്യ ചിത്രമായ ‘പോടാ പോടി’ വലിയ വിജയമാകാത്ത സാഹചര്യത്തിലാണ് തന്റെ രണ്ടാം ചിത്രമായ നാനും റൗഡി താൻ എന്ന സിനിമയുടെ ജോലി ആരംഭിക്കുന്നത്. ധാരാളം ബുദ്ധിമുട്ടുകൾക്കൊടുവിൽ നടൻ ധനുഷ് തന്റെ നിർമ്മാണ കമ്പനിയായ വണ്ടർ ബാർ ഫിലിംസിന്റെ ബാനറിൽ ചിത്രം നിർമ്മിക്കാൻ തയ്യാറായി. നയൻതാരയെ കണ്ട് കഥ പറയാൻ ആവശ്യപ്പെട്ടത് ധനുഷാണ്. ഒന്നര മണിക്കൂർ നയൻതാരയോട് സംസാരിക്കുക മാത്രമായിരുന്നു തന്റെ ലക്ഷ്യം. നയൻതാര ചെയ്യാൻ സാധ്യത ഇല്ലായെന്ന് ഉറപ്പായതുകൊണ്ട് തന്നെ നസ്രിയയെയാണ് ചിത്രത്തിലേക്ക് രണ്ടാമത് ആലോചിച്ചത്. ഞാൻ എന്റെ സഹസംവിധായകൻ സെന്തിലിനോടൊപ്പം ഒരു ഓട്ടോ പിടിച്ചു പോയി. സെന്തിലിനോട് കാത്തിരിക്കൂ, ഞാൻ പോയി കഥ പറഞ്ഞിട്ട് വേഗം വരാമെന്ന് പറഞ്ഞു. നയൻതാര സിനിമയ്‌ക്ക് സമ്മതിക്കില്ലെന്ന് എനിക്ക് ഉറപ്പുണ്ട്. അതുകൊണ്ട് വേഗം പോയി കണ്ടിട്ട് വരാമെന്നാണ് ഞാൻ കരുതിയത്.

കഥ പറയാൻ അവസരം കിട്ടിയെങ്കിലും നയൻതാര ഒരിക്കലും ആ സിനിമ ചെയ്യില്ല എന്നു തന്നെയാണ് കരുതിയത്. കഥ കേൾക്കാനിരിക്കുമ്പോൾ നയൻതാര ബഹുമാനത്തോടെയാണ് ഇടപെട്ടത്. സാധാരണ കഥ പറയാൻ ചെല്ലുമ്പോൾ അഭിനേതാക്കാൾ ഫോണിൽ നോക്കുകയോ പകുതി മാത്രം ശ്രദ്ധിക്കുകയോ പാതിമനസ്സോടൊക്കെയോ ആയിരിക്കും കേൾക്കുക. എന്നാൽ നയൻതാരയാകട്ടെ എത്ര സമയമെടുക്കുമെന്ന് എന്നോട് ചോദിച്ചു, ആ സമയത്ത് തന്നെ ശല്യപ്പെടുത്തരുതെന്ന് നയൻതാര അസിസ്റ്റന്റിനോട് പറഞ്ഞു. എന്നിട്ട് ഫോൺ സ്വിച്ച് ഓഫ് ചെയ്ത് ‘ഞാൻ തയ്യാറാണ്’ എന്ന് എന്നോട് പറഞ്ഞു. കഥ മുഴുവൻ കേൾക്കുകയും വേഷം ചെയ്യാമെന്ന് സമ്മതിക്കുകയും ചെയ്തു. അതോടെ നാനും റൗഡി താൻ എന്ന തന്റെ രണ്ടാമത്തെ ചിത്രവും തന്റെ പ്രണയവും ഉണ്ടായി്’- വിഘ്‌നേഷ് പറഞ്ഞു.