സന്നിധാനം: ശബരിമല ദർശനം നടത്തി തമിഴ് നടൻ യോഗി ബാബു. വിഷു ദിനത്തിലാണ് താരം മല ചവിട്ടിയിരിക്കുന്നത്. ആദ്യമായാണ് താൻ ശബരിമലയിലെത്തി അയ്യനെ കാണുന്നതെന്നും താരം പറഞ്ഞു. തമിഴ്നാട്ടിലെ എല്ലാ ക്ഷേത്രങ്ങളിലും പോകാറുണ്ട്. എന്നാൽ ഇതുവരെ ശബരിമലയിലെത്തി ദർശനം നടത്തിയിട്ടില്ല. അയ്യപ്പൻ എന്നെ വിളിച്ചു, ഞാൻ വന്ന് ദർശനം നടത്തി. വളരെയധികം സന്തോഷമുണ്ട്. ശബരിമല ആസ്പദമാക്കി ഒരു സിനിമ ചെയ്യുന്നതിന്റെ സന്തോഷത്തിൽ കൂടിയാണ് താനെന്നും യോഗി ബാബു മാദ്ധ്യമങ്ങളോട് പറഞ്ഞു.
യോഗി ബാബു, പ്രമോദ് ഷെട്ടി എന്നിവർ പ്രധാന വേഷത്തിലെത്തുന്ന ചിത്രമാണ് സന്നിധാനം പി ഒ. സിനിമയുടെ പൂജ കഴിഞ്ഞയിടയ്‌ക്ക് സന്നിധാനത്ത് വച്ച് നടന്നിരുന്നു. സംവിധായകനും നടി നയൻതാരയുടെ ഭർത്താവുമായ വിഘ്നേഷ് ശിവൻ ഫസ്റ്റ് ക്ലാപ് അടിച്ചു. സ്വിച്ച് ഓൺ കർമ്മം തിരുവിതാംകൂർ ദേവസ്വം ബോർഡ് പ്രസിഡന്റ്‌ അഡ്വക്കേറ്റ് കെ.അനന്തഗോപനായിരുന്നു നിർവഹിച്ചത്.
ശബരിമല പശ്ചാത്തലമായി ഒരുക്കുന്ന ഈ പാൻ ഇന്ത്യൻ സിനിമ സംവിധാനം ചെയ്യുന്നത് രാജീവ്‌ വൈദ്യയാണ്. സർവ്വത സിനി ഗാരേജ്, ഷിമോഗ ക്രീയേഷൻസ് എന്നീ ബാനറുകളിൽ മധുസൂദൻ റാവു, ഷബീർ പത്താൻ എന്നിവരാണ് ചിത്രം നിർമ്മിക്കുന്നത്. മകരവിളക്ക് ദിവസം ശബരിമല സന്നിധാനത്ത് ഒരു സിനിമയുടെ പൂജ നടന്നത് സിനിമ ചരിത്രത്തിൽ ആദ്യമായായിരുന്നു.
Comments