പരീക്ഷണ ഓട്ടം ആരംഭിച്ച് വന്ദേഭാരത്; തിരുവനന്തപുരത്ത് നിന്നും പുറപ്പെട്ടു; ആകാംക്ഷയോടെ കേരളം

തിരുവനന്തപുരം: കേരളത്തിന് മോദി സർക്കാരിന്റെ വിഷു കൈനീട്ടമായി ലഭിച്ച വന്ദേഭാരത് എക്സ്പ്രസ് പരീക്ഷണ ഓട്ടം ആരംഭിച്ചു. തിരുവനന്തപുരത്ത് നിന്ന് കണ്ണൂരിലേക്കാണ് പരീക്ഷണ ഓട്ടം നടക്കുന്നത്. ഇന്ന് രാവിലെ 5.10-ന് തിരുവനന്തപുരം സെൻട്രൽ റെയിൽവെ സ്റ്റേഷനിലെ രണ്ടാം നമ്പർ പ്ലാറ്റ്ഫോമിൽ നിന്നും ട്രെയിൻ യാത്ര പുറപ്പെട്ടു.

ഏഴ് മണിക്കൂർ കൊണ്ട് ട്രെയിൻ കണ്ണൂരിലെത്തുമെന്നാണ് പ്രതീക്ഷിക്കുന്നത്. 12.10-നാണ് ട്രെയിൻ കണ്ണൂരിൽ എത്തേണ്ട സമയം. അതേസമയം ട്രെയിനിന്റെ ഷെഡ്യൂളും റെയിൽവേ ഇന്ന് ഔദ്യോഗികമായി പ്രഖ്യാപിക്കുമെന്നാണ് കരുതുന്നത്.

തിരുവനന്തപുരത്ത് നിന്ന് ട്രെയിൻ പുറപ്പെടുന്ന സമയം, സ്റ്റോപ്പുകള്‍, നിരക്കുകൾ എന്നിവയുടെ ഔദ്യോഗിക പ്രഖ്യാപനം ഉണ്ടായേക്കും. ഈ മാസം 25-നാണ് പ്രധാനമന്ത്രി ഔദ്യോഗികമായി കേരളത്തിന്റെ വന്ദേ ഭാരത് എക്സ്പ്രസ് ഫ്ലാഗ് ഓഫ് ചെയ്യുന്നത്. കഴിഞ്ഞ ദിവസം കേരളത്തിലെത്തിയ ട്രെയിനിന് വൻ സ്വീകരണമാണ് ലഭിച്ചത്.