200 രൂപയിൽ നിലവിലെ ഡ്രൈവിംഗ് ലൈസൻസ് സ്മാർട്ടാക്കി സ്വന്തമാക്കാം; ഒരു വർഷം കഴിഞ്ഞാൽ അടയ്‌ക്കേണ്ടത് 1200 രൂപ

തിരുവനന്തപുരം : ലാമിനേറ്റഡ് ഡ്രൈവിംഗ് ലൈസൻസ് ഉള്ളവർക്ക് 200 രൂപ മുടക്കുന്നതിലൂടെ പുത്തൻ സമാർട്ട് ലൈസൻസിലേക്ക് മാറാം. ഏഴ് സുരക്ഷക്രമീകരണങ്ങളുള്ള പുതിയ ലൈസൻസുകളുടെ വിതരണോദ്ഘാടന വേദിയിലാണ് മന്ത്രി ആന്റണി രാജു ഇക്കര്യം പറഞ്ഞത്. പുതിയ സ്മാർട്ട് ലൈസൻസിലേക്ക് മാറമ്പോൾ പഴയ ലൈസൻസ് തിരികെ ഏൽപ്പിക്കേണ്ടതില്ല. പരിവാഹൻ വെബ്‌സൈറ്റിലൂടെ ഓൺലൈൻ മുഖേനയാണ് അപേക്ഷ നൽകേണ്ടത്. പുതിയ ലൈസൻസ് തപാലിലൂടെ ലഭിക്കണമെന്നുള്ളവർ തപാൽ ഫീസും അടയ്‌ക്കേണ്ടതുണ്ട്. ഒരു വർഷത്തേക്ക് മാത്രമാണ് ഇളവ് അനുവദിച്ചിരിക്കുന്നത്. ഇതിന് ശേഷം ഡ്യൂപ്ലിക്കേറ്റ് ഡ്രൈവിംഗ് ലൈസൻസിനുള്ള 120 രൂപയും തപാൽക്കൂലിയും നൽകേണ്ടിവരും.

മെയ് മുതൽ വാഹന രജിസ്‌ട്രേഷൻ സർട്ടിഫിക്കറ്റുകളും പെറ്റ് ജി കാർഡിലേക്ക് മാറും. ഏഴ് സുരക്ഷാ സംവിധാനങ്ങളാണ് ഈ കാർഡിലും ഒരുക്കിയിട്ടുള്ളത്. എടിഎം കാർഡുകളുടെ മാതൃകയിൽ പേഴ്‌സിൽ സൂക്ഷിക്കാവുന്ന തരത്തിലാണ് പെറ്റ് ജി കാർഡുകൾ. മെച്ചപ്പെട്ട അച്ചടി സംവിധാനം ഉപയോഗിച്ചിരിക്കുന്നതിനാൽ തന്നെ അക്ഷരങ്ങൾ മായില്ല.

പ്രത്യേക നമ്പർ, അൾട്രവയലറ്റ് ലൈറ്റിൽ തെളിയുന്ന പാറ്റേൺ, നോട്ടുകളിലേതുപോലെ ഗില്ലോച്ചെ ഡിസൈൻ, സൈഡുകളിൽ മൈക്രോ അക്ഷരങ്ങളിലെ ബോർഡർ ലൈൻ, ഹോളോഗ്രാം, വെളിച്ചം വീഴുന്നതിനനുസരിച്ച് നിറം മാറുന്ന ഇന്ത്യയുടെ ചിത്രം, സ്‌കാൻ ചെയ്താൽ ലൈസൻസ് സംബന്ധിച്ച വിവരങ്ങളെല്ലാം ലഭ്യമാകുന്ന ക്യൂആർകോഡ് എന്നിവ ഇതിലെ പ്രത്യേകതകളാണ്.