ഐഎസ്ആർഒ, ഐടി പാർക്കുകൾ എന്നിവിടങ്ങളിൽ ജോലി ചെയ്യുന്ന ചുമട്ടു തൊഴിലാളികൾക്ക് പുതിയ യൂണിഫോം. നെയിം പ്ലേറ്റ്, ബാഡ്ജ്, ട്രൈ കളർ ബാൻഡ് എന്നിവ ഉൾപ്പെടെ ചാരനിറത്തിലുള്ള ഷർട്ടും ട്രാക്ക് സ്യൂട്ടുമണിഞ്ഞ വിദഗ്ധരായ ചുമട്ടുതൊഴിലാളികൾ അടുത്ത മാസം മുതലാകും തൊഴിലിടങ്ങളിലെത്തുക. ഐഎസ്ആർഒ പോലെ സാങ്കേതികവൈദഗ്ധ്യം ആവശ്യമുള്ളയിടങ്ങളിൽ ജോലി ചെയ്യുന്ന ചുമട്ടുതൊഴിലാളികൾക്കാണ് ആദ്യഘട്ടത്തിൽ പരിശീലനവും പുതുവേഷവും നൽകുന്നത്.
പിന്നീട് സംസ്ഥാനമൊട്ടാകെ പദ്ധതി വ്യാപിപ്പിക്കും. ചുമട്ടുതൊഴിലാളികളോടുള്ള സമൂഹത്തിന്റെ മനോഭാവം മാറ്റിയെടുക്കാനും തൊഴിൽ വൈദഗ്ധ്യം ഉറപ്പുവരുത്താനും വിപുലമായ പരിശീലന പരിപാടികളാണ് നടപ്പാക്കുന്നത്. ആലുവ പെപ്സി ഗോഡൗൺ, ഐഎസ്ആർഒ യാർഡ്, ഇടയാർ ഇൻഡസ്ട്രിയൽ പാർക്ക്. തൃക്കാക്കര ഇൻഫോപാർക്ക് എന്നിവിടങ്ങളിലെ 150 തൊഴിലാളികൾക്കുള്ള പരിശീലനം പുരോഗമിക്കുകയാണ്.
തൊഴിൽ മേഖലയിലുണ്ടായ പരിണാമങ്ങളെ കുറിച്ചുള്ള ബോധവത്കരണമാണ് ആദ്യപടി. പരിശീലനം പൂർത്തിയാകുന്ന മുറയ്ക്ക് തൊഴിലിടങ്ങളിൽ സുരക്ഷയ്ക്കായുള്ള ഉപകരണങ്ങളും നൽകും. മേയ് മാസം ആദ്യവാരത്തോടെ പുതിയ വേഷത്തിലും പുതിയ ഭാവത്തിലും തൊഴിലിടങ്ങളിലെത്തും. സിയാൽ, ടെക്നോപാർക്ക്, ഇൻഫോപാർക്ക്. കൊച്ചിൻ പോർട്ട എന്നിവിടങ്ങളിലെ തൊഴിലാളികൾക്കാണ് അടുത്തതായി പരിശീലനം നൽകുക.
Comments