സൗത്ത് ഇന്ത്യയിലെ മൂന്ന് സൂപ്പർ താരങ്ങൾ നാളെ തിയറ്ററുകളിൽ ഏറ്റ് മുട്ടും. മമ്മൂട്ടിയുടെ തെലുങ്ക് ചിത്രം ഏജന്റ്, വിക്രമിന്റെ പൊന്നിയിൻ സെൽവൻ 2, ഫഹദിന്റെ പാച്ചുവും അത്ഭുതവിളക്കും എന്നീ ചിത്രങ്ങളാണ് നാളെ പ്രദർശനത്തിെനത്തുക. ഒന്നാം ഭാഗത്തിന്റെ വൻ വിജയത്തിന് ശേഷം പൊന്നിയിൻ സെൽവന്റെ രണ്ടാം ഭാഗത്തിനായി ആകാംഷയോടെയാണ് ആരാധകർ കാത്തിരുന്നത് . ആദ്യഭാഗം പോലെ തന്നെ രണ്ടാം ഭാഗവും തമിഴിന് പുറമേ അഞ്ച് ഭാഷകളിലാണ് എത്തുക. കഴിഞ്ഞ സെപ്റ്റംബർ 30 നാണ് ഒന്നാം ഭാഗം തീയേറ്ററുകളിലെത്തിയത്. ഏറ്റവും വേഗത്തിൽ തമിഴ്നാട്ടിൽ 100 കോടി ക്ലബിൽ ഇടം പിടിച്ച ചിത്രം കൂടിയാണ് പൊന്നിയിൻ സെൽവൻ 1.
മെഗാസ്റ്റാർ മമ്മൂട്ടിയും യുവതാരം അഖിൽ അക്കിനേനിയും ഒന്നിക്കുന്ന പാൻ ഇന്ത്യ ആക്ഷൻ ത്രില്ലർ ചിത്രമാണ് ഏജന്റ്. തെലുങ്ക്, മലയാളം, ഹിന്ദി, തമിഴ്, കന്നഡ ഭാഷകളിൽ ചിത്രം റിലീസാകും. സുരേന്ദർ റെഡ്ഡി രചനയും സംവിധാനവും നിർവഹിക്കുന്ന ചിത്രത്തിൽ സാക്ഷി വൈദ്യയാണ് നായിക. ചിത്രത്തിൽ നെഗറ്റീവ് ഷേയ്ഡുള്ള കഥാപാത്രത്തെയാണ് മമ്മൂട്ടി അവതരിപ്പിക്കുന്നതെന്നാണ് റിപ്പോർട്ടുകൾ. ഒരിടവേളയ്ക്ക് ശേഷം മമ്മൂട്ടി തെലുങ്കിലേയ്ക്ക് എത്തുന്ന ചിത്രം കൂടിയാണ് ഏജന്റ്.
ഫഹദ് ഫാസിലിനെ നായകനാക്കി അഖിൽ സത്യൻ സംവിധാനം ചെയ്യുന്ന ചിത്രമാണ് പാച്ചുവും അത്ഭുതവിളക്കും. ചിത്രത്തിന്റെ രചനയും സംവിധാനവും എഡിറ്റിംഗും നിർവഹിച്ചിരിക്കുന്നത് അഖിൽ തന്നെയാണ്. ഇന്നസെന്റ് അവസാനമായി അഭിനയിച്ച ചിത്രം കൂടിയാണിത്. ചിത്രത്തിൽ മുകേഷും നിരവധി പുതുമുഖങ്ങളും അണിനിരക്കുന്നു.
