‘സെൻസർ ബോർഡ് അംഗീകരിച്ച സിനിമയെ നിരോധിക്കാൻ പാടില്ല; അത് ഭരണഘടനയെ അപമാനിക്കുന്നതിന് തുല്യം; ദി കേരള സ്റ്റോറിക്ക് വിലക്കേർപ്പെടുത്തിയതിനെ കുറിച്ച് കങ്കണ

ദി കേരള സ്റ്റോറി സിനിമയ്‌ക്ക് ചില സംസ്ഥാനങ്ങളിൽ ഏർപ്പെടുത്തിയ നിരോധനത്തിൽ പ്രതികരിച്ച് രംഗത്തെത്തിയിരിക്കുകയാണ് നടി കങ്കണ റണാവത്ത്. ഹരിദ്വാർ സന്ദർശിച്ച് മടങ്ങവെ മാദ്ധ്യമങ്ങളോട് സംസാരിക്കവെയാണ് ചിത്രത്തിന് വിലക്കേർപ്പെടുത്തിയ സംഭവത്തിൽ തന്റെ അഭിപ്രായം കങ്കണ പങ്കുവെച്ചത്.

‘സെൻസർ ബോർഡ് അംഗീകരിച്ച സിനിമയെ നിരോധിക്കാൻ പാടില്ല. അത് ഭരണഘടനയെ അപമാനിക്കുന്നതിന് തുല്യമാണ്. ചില സംസ്ഥാനങ്ങൾ കേരള സ്റ്റോറിക്ക് വിലക്കേർപ്പെടുത്തിയത് ശരിയായില്ല. ഏത് സിനിമയും വിജയിക്കുന്നത് സിനിമാ മേഖലയെ സംബന്ധിച്ച് നല്ല വാർത്തയാണ്. കേരള സ്റ്റോറി എന്ന സിനിമ നിർമിക്കപ്പെടുമ്പോൾ അതിലൂടെ ജനങ്ങളുടെ പരാതികളാണ് പരിഹരിക്കപ്പെടുന്നതെന്ന് കങ്കണ പറഞ്ഞു.

കേരളാ സ്റ്റോറിപോലുള്ള നല്ല സിനിമകൾ സിനിമാ മേഖലയെ തന്നെ സഹായിക്കുന്നുണ്ട്. ജനങ്ങൾ സിനിമ കാണാൻ ആഗ്രഹിക്കുന്നതും അതിനെ പ്രോത്സാഹിപ്പിക്കുന്നതും സിനിമാ മേഖലയ്‌ക്ക് ഗുണം നൽകും എന്നായിരുന്നു കങ്കണയുടെ വാക്കുകൾ.