പവൻ കല്യാൺ നായകനാകുന്ന ഹരിഹര വീരമല്ലുവിന്റെ സെറ്റിൽ തീപിടിത്തം;സിനിമയുടെ റിലീസ് നീളും

ഹൈദരാബാദ് : തെലുങ്ക് സൂപ്പർ താരം പവൻ കല്യാണിന്റെ “ഹരിഹര വീരമല്ലു” എന്ന ചിത്രത്തിന്റെ സെറ്റിൽ വൻ തീപിടിത്തം. ഞായറാഴ്ച അർദ്ധരാത്രി ദുണ്ടിഗലിലെ ബീരാംപേട്ടിൽ ഒരുക്കിയ സിനിമയുടെ പടുകൂറ്റൻ സെറ്റിലാണ് സംഭവം. ഭാഗ്യവശാൽ, സെറ്റിൽ ആരും ഉണ്ടായിരുന്നില്ല. സംഭവത്തിൽ ദുണ്ടിഗൽ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.

സിനിമയുടെ സെറ്റിന്റെ വലിയൊരു ഭാഗം അഗ്നിക്കിരയായതിനാൽ നിർമ്മാണ കമ്പനിക്ക് വൻ നഷ്‌ടം സംഭവിച്ചതായി പറയപ്പെടുന്നു. പുതിയ സെറ്റ് ആദ്യം മുതൽ നിർമ്മിക്കേണ്ടതിനാൽ ചിത്രത്തിന്റെ ഷൂട്ടിംഗ് വൈകാനും സംഭവം ഇടയാക്കും. സംഭവത്തെക്കുറിച്ച് ഇതുവരെ ഔദ്യോഗിക പ്രസ്താവന വന്നിട്ടില്ല.

ഇന്ത്യയൊട്ടാകെ വിവിധ ഭാഷകളിൽ പുറത്തിറങ്ങുന്ന ഹരിഹര വീരമല്ലു സംവിധാനം ചെയ്യുന്നത് മണികർണിക: ദി ക്വീൻ ഓഫ് ഝാൻസി ഫെയിം ക്രിഷ് ജഗർലമുടിയാണ്. പവൻ കല്യാണിനെ കൂടാതെ നിധി അഗർവാൾ, ബോബി ഡിയോൾ എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നു.

ചിത്രം ഒക്ടോബറിൽ റിലീസ് ചെയ്യാനായിരുന്നു ആദ്യം തീരുമാനിച്ചിരുന്നതെങ്കിലും സെറ്റിന്റെ തകർച്ചയെ തുടർന്ന് റിലീസ് നീട്ടിയേക്കും.

ആന്ധ്രാപ്രദേശിലെ നിയമസഭാ തിരഞ്ഞെടുപ്പിന് തയ്യാറെടുക്കുന്ന പവൻ കല്യാൺ തന്റെ എല്ലാ സിനിമാ ചിത്രീകരണങ്ങളും ഉടൻ അവസാനിപ്പിക്കാൻ ഒരുങ്ങുകയാണ്.