അബുദാബി: അബുദാബി ബിഗ് ടിക്കറ്റ് നറുക്കെടുപ്പിൽ 45 കോടി രൂപ സ്വന്തമാക്കിയത് മലയാളി നഴ്സ്. വർഷങ്ങളായി അബുദാബിയിൽ ജോലി ചെയ്യുന്ന ലൗലി മോൾ അച്ചാമ്മയ്ക്കാണ് സമ്മാനം തുക ലഭിച്ചത്. ഇന്നലെയായിരുന്നു നറുക്കെടുപ്പ് നടന്നത്. 20 ദശലക്ഷം ദിർഹമാണ് സമ്മാനമായി ലഭിക്കുന്നത്. ഇന്ത്യൻ രൂപ ഏകദേശം 45 കോടി രൂപയാണ് ഇത്.
ലൗലി 21 വർഷമായി അബുദാബിയിൽ കുടുംബസമേതം താമസിക്കുകയാണ്. ഭർത്താവ് എല്ലാ മാസവും ബിഗ് ടിക്കറ്റ് എടുക്കാറുണ്ടെന്ന് ലൗലി പറഞ്ഞു. അബുദാബി രാജ്യാന്തര വിമാനത്താവളത്തിലെ ഇൻ സ്റ്റോർ കൗണ്ടറിൽ നിന്നാണ് മിക്കവാറും ടിക്കറ്റ് എടുക്കാറുള്ളതെന്നും ലൗലി കൂട്ടിച്ചേർത്തു.
സമ്മാനത്തുകയിൽ നിന്ന് ലഭിക്കുന്ന കുറച്ച് പണം ജീവകാരുണ്യ പ്രവർത്തനങ്ങൾക്ക് നൽകും. മക്കളുടെ വിദ്യാഭ്യാസമാണ് ഏറ്റവും പ്രധാനമെന്നും അവർ വ്യക്തമാക്കി. ബിഗ് ടിക്കറ്റ് നറുക്കെടുപ്പിൽ മറ്റ് നാല് ഇന്ത്യക്കാർക്ക് കൂടി സമ്മാനങ്ങൾ ലഭിച്ചിട്ടുണ്ട്.
