തൃശൂർ: വാഹനാപകടത്തിൽ പരിക്കേറ്റ ബിനു അടിമാലി ആശുപത്രിയിൽ ചികിത്സയിൽ തുടരുകയാണ്. അദ്ദേഹത്തിന് ചെറിയൊരു ശസ്ത്രക്രിയ കഴിഞ്ഞിരിക്കുകയാണ്. ബിനുവിന് ഇപ്പോൾ വിശ്രമമാണ് വേണ്ടതെന്ന് ടെലിവിഷൻ ഷോ ഡയറക്ടർ അനൂപ് വ്യക്തമാക്കി. കൊല്ലം സുധിയുടെ മരണത്തിനിടയാക്കിയ വാഹനാപകടത്തിലാണ് ബിനുവിനും പരിക്കേറ്റത്.
ബിനുവിന്റെ ആരോഗ്യവിവരങ്ങൾ പങ്കുവെച്ചുകൊണ്ട് വീഡിയോ പുറത്ത് വിട്ടിരിക്കുകയാണ് അനൂപ്. ബിനു അടിമാലിയെ കണ്ടതിന് ശേഷം താൻ മെഡിക്കല് ട്രസ്റ്റ് ഹോസ്പിറ്റലിനു പുറത്ത് നില്ക്കുകയാണ്. അദ്ദേഹത്തിന് ചെറിയ സര്ജറി നടത്തി. മുഖത്ത് ചെറിയ പൊട്ടല് ഉണ്ടായിരുന്നുവെന്നും വീഡിയോയില് അനൂപ് പറയുന്നുണ്ട്.
‘ഇപ്പോള് അദ്ദേഹം പൂര്ണ വിശ്രമത്തിലാണ്. ക്രിട്ടിക്കല് സാഹചര്യം അദ്ദേഹം മറികടന്നു. ബിനു ചേട്ടന്റെ അപ്ഡേറ്റ് എന്താണെന്ന് ഒരുപാട് പേര് ചോദിക്കുന്നുണ്ട്. അദ്ദേഹം ആവശ്യപ്പെട്ടാണ് വീഡിയോ ചെയ്യുന്നത്. കുറച്ച് നേരം ഞങ്ങള് സംസാരിക്കുകയുണ്ടായി. വികാരനിര്ഭരമായ നിമിഷങ്ങളായിരുന്നു. അതൊക്കെ പിന്നീട് ചോദിച്ച് മനസ്സിലാക്കാം. ഐസിയുവിന്റെ അടുത്തുള്ള റൂമിലാണ് പുള്ളിയുള്ളത്. വൈകാതെ മറ്റൊരു റൂമിലേക്ക് മാറ്റുമായിരിക്കും. ഇപ്പോള് അദ്ദേഹത്തിന് ആവശ്യം വിശ്രമമാണ്. എത്രയും വേഗം സുഖമാകാൻ പ്രാര്ഥിക്കണം. ഒരുപാട് പേര് വീഡിയോ ചെയ്യാൻ ആശുപത്രിയുടെ പുറത്തെത്തിയിട്ടുണ്ട്. ആരും അദ്ദേഹത്തെ ശല്യപ്പെടുത്താൻ ശ്രമിക്കരുത്. ഫോണ് ഒന്നും ഉപയോഗിക്കാൻ പറ്റില്ല. പുള്ളിയുടെ ഫാസ്റ്റ് റിക്കവറിക്കായി പ്രാര്ഥിക്കുക. അനാവശ്യ ന്യൂസുകള് പോസ്റ്റ് ചെയ്യാതിരിക്കുക. എല്ലാവരും പ്രാര്ഥിക്കുക, ബിനു ആരോഗ്യവാനായി തിരിച്ചുവരട്ടേ.’- എന്നായിരുന്നു ബിനുവിന്റെവാക്കുകൾ.
പ്രോഗ്രാം കഴിഞ്ഞ് വടകരയിൽനിന്ന് തിരിച്ചുവരവെ തിങ്കളാഴ്ച പുലർച്ചെ 4.40-ഓടെ തൃശൂർ കൈപ്പമംഗലത്ത് വെച്ചായിരുന്നു അപകടം. ഇവർ സഞ്ചരിച്ചിരുന്ന കാർ എതിരെ വന്ന പിക്കപ്പുമായി കൂട്ടി ഇടിക്കുകയായിരുന്നു. അപകട സമയത്ത് ബിനു അടിമാലി, ഉല്ലാസ് അരൂർ, മഹേഷ് എന്നിവരും ഒപ്പമുണ്ടായിരുന്നു. ഗുരുതരമായി പരിക്കേറ്റ കൊല്ലം സുധിയെ ഉടൻതന്നെ കൊടുങ്ങല്ലൂരിലെ സ്വകാര്യ ആശുപത്രിയിൽ എത്തിച്ചെങ്കിലും മരണം സംഭവിക്കുകയായിരുന്നു.
