സ്‌പൈഡർമാൻ ടോം ഹോളണ്ട് അഭിനയം നിർത്തുന്നു; ഇടവേള പ്രഖ്യാപിച്ച് നടൻ; കാരണമിത്..

സ്‌പൈഡർമാൻ – നോ വേ ഹോം നടൻ ടോം ഹോളണ്ട് അഭിനയത്തിൽ നിന്നും ഇടവേളയെടുക്കുന്നു. ദി ക്രൗഡഡ് റൂം എന്ന സീരീസ് നിർമ്മിച്ചതിന് പിന്നാലെയാണ് നടന്റെ തീരുമാനം. സീരീസിന്റെ പ്രമേയം തന്നെ വല്ലാതെ ബാധിച്ചുവെന്നും മാനസികമായി തളർത്തിയെന്നും നടൻ പ്രതികരിച്ചു. ഏറെ പ്രയാസം തോന്നുന്ന ഒരു സമയമായതിനാൽ അഭിനയത്തിൽ നിന്നും ഒരു വർഷത്തേക്ക് ഇടവേളയെടുക്കുകയാണെന്ന് നടൻ വ്യക്തമാക്കി.

ആപ്പിൾ ടിവി പ്ലസ് ആന്തോളജി ഷോ ആയ ദി ക്രൗഡഡ് റൂമിൽ അദ്ദേഹം അഭിനയിക്കുകയും സീരീസ് നിർമ്മിക്കുകയും ചെയ്തിരുന്നു. 10 എപ്പിസോഡ് മാത്രമുള്ള ലിമിറ്റഡ് സീരീസാണിത്. 1979ൽ നടന്ന ന്യൂയോർക്ക് സിറ്റി ഷൂട്ടിങ് ആക്രമണത്തിൽ പങ്കുണ്ടെന്ന കാരണത്താൽ അറസ്റ്റിലായ വ്യക്തിയുടെ കഥയാണ് സീരീസിലൂടെ പറയുന്നത്. സൈക്കോളജിക്കൽ ത്രില്ലർ വിഭാഗത്തിൽ ഉൾപ്പെടുന്ന കഥയിൽ ഡാന്നി സല്ലിവൻ എന്ന കഥാപാത്രമാണ് ടോം ഹോളണ്ട് ചെയ്തത്. മാനസികമായ വെല്ലുവിളികൾ നേരിടുന്ന ആളുകൾ ജീവിത വിജയം നേടുന്ന പ്രചോദനാത്മകമായ യഥാർത്ഥ കഥകളെ സീരീസിൽ ഉൾക്കൊള്ളിച്ചിരുന്നു.

സീരീസിന് വേണ്ടി ഏറെ കഠിനാധ്വാനം ചെയ്തിരുന്നുവെന്നും ഷൂട്ടിങ് സമയത്ത് അത്  ആസ്വദിച്ചിരുന്നുവെങ്കിലും പിന്നീട് മാനസികമായി തളർത്തിയെന്ന് ടോം ഹോളണ്ട് പറയുന്നു. അതിനാലാണ് ഒരു ഇടവേളയെടുക്കുന്നതെന്ന് 27-കാരനായ നടൻ വ്യക്തമാക്കി. അതേസമയം ഷോയുടെ എപ്പിസോഡുകൾ ഇന്നുമുതൽ (ജൂൺ 9) ആപ്പിൾ ടിവി പ്ലസിൽ സ്ട്രീം ചെയ്യും. മൂന്ന് എപ്പിസോഡുകൾ ആദ്യം റിലീസ് ചെയ്തുകഴിഞ്ഞാൽ ആഴ്ചയിൽ ഒരോ എപ്പിസോഡ് വീതമാണ് റിലീസ് ചെയ്യുക. ജൂലൈ 28ന് ലിമിറ്റഡ് സീരീസിന്റെ സ്ട്രീമിങ് അവസാനിക്കും.