ബീജിംഗ്: തൊഴിലില്ലാത്തവരുടെ എണ്ണം ചൈനയിൽ വൻ തോതിൽ വർദ്ധിക്കുകയാണെന്ന വാർത്ത അടുത്തിടെയാണ് പുറത്ത് വന്നത്. ഇപ്പോഴിതാ, ഉയർന്ന ശമ്പളം വാങ്ങുന്ന യുവാക്കൾ ജോലി ഉപേക്ഷിച്ച് ചെറിയ ജോലികൾ തേടുന്നെന്ന വാർത്തയാണ് അന്താരാഷ്ട്ര മാദ്ധ്യമങ്ങൾ റിപ്പോർട്ട് ചെയ്യുന്നത്. രാജ്യത്തെ നിരവധി യുവാക്കളാണ് ജോലി ഉപേക്ഷിച്ചതിനെ കുറിച്ച് സമൂഹമാദ്ധ്യമങ്ങളിൽ കുറിപ്പുകൾ പങ്കുവെച്ചിരിക്കുന്നത്.
കഴിഞ്ഞ ഒരു വർഷമായി ഇൻസ്റ്റാഗ്രാമിന്റെ ചൈനീസ് പതിപ്പായ ‘ഷൗഹോങ്ഷൂ’വിൽ (Xiaohongshu) തങ്ങളുടെ പുതിയ ജോലിയുടെ വിശേഷം അറിയിക്കുന്ന ഫോട്ടോകളും വീഡിയോകളും ചൈനയിലെ യുവാക്കൾ ഷെയർ ചെയ്യുന്നുണ്ട്. ജൂൺ 12-ന് ബിസിനസ് ഇൻസൈഡർ റിപ്പോർട്ട് ചെയ്യുന്നത് പ്രകാരം, “മൈ ഫസ്റ്റ് ഫിസിക്കൽ വർക്ക് എക്സ്പീരിയൻസ്” എന്ന ഹാഷ്ടാഗിൽ നിരവധിപേർ പോസ്റ്റുകൾ പങ്കുവെക്കുന്നുണ്ട്.
ഇത്തരത്തിൽ സമൂഹമാദ്ധ്യമത്തിൽ കുറിപ്പ് പങ്കുവെയ്ക്കുന്ന യുവ പ്രൊഫഷണലുകളിൽ ഏറെയും ചെറിയ ജോലികളിൽ നിന്നും ലഭിക്കുന്ന മാനസിക സന്തോഷവും സംതൃപ്തിയുമാണ് എടുത്തു പറയുന്നത്. ജോലി മാറിയത് ഏറെ ആശ്വാസകരമാണെന്നും പെർഫോമൻസ് റിപ്പോർട്ടിനെ കുറിച്ചോർത്ത് ഇനി ടെൻഷനടിക്കേണ്ടല്ലോ എന്നുമാണ് ഭൂരിഭാഗം പേരുടെയും കുറിപ്പുകളിൽ നിന്നും വ്യക്തമാക്കുന്നത്.
ശാരീരിക അധ്വാനം ആവശ്യമായതും എന്നാൽ തുച്ഛമായ ശമ്പളവും ലഭിക്കുന്ന വെയിറ്റർ, കാഷ്യർ, കാപ്പി ഉണ്ടാക്കുന്നതു പോലുള്ള ജോലികളാണ് കൂടുതൽ പേരും തിരഞ്ഞെടുക്കുന്നത്. ചൈനയിലെ യുവാക്കളുടെ ഇടയിൽ തൊഴിലില്ലായ്മ നിരക്ക് റെക്കോഡ് ഉയരത്തിലേക്ക് കുതിച്ചു ഉയരുന്നതിനിടെയാണ് രാജ്യമെങ്ങും ഈ പ്രവണത ദൃശ്യമാകുന്നത് എന്നതും ശ്രദ്ധേയമാണ്.
‘ഉയർന്ന ശമ്പളം ലഭിക്കുന്ന കൺസൾട്ടിങ് ജോലി ഞാൻ ഉപേക്ഷിച്ചു. ഇതോടെ അന്തമില്ലാത്ത ഇ-മെയിലുകളിൽ നിന്നും തുടർച്ചയായ ഇന്റർവ്യൂവുകളിൽ നിന്നും നിരന്തരമുള്ള പവർ പോയിന്റ് പ്രസന്റേഷനിൽ നിന്നുമൊക്കെ രക്ഷപ്പെട്ടു. നേരത്തെ വാങ്ങിയിരുന്ന ശമ്പളത്തിന്റെ ഒരു ഭാഗം മാത്രമേയുള്ളൂ എങ്കിലും കോഫി ഷോപ്പിൽ കാപ്പി ഉണ്ടാക്കുന്ന ജോലിയിൽ പ്രവേശിച്ച് ജീവിതം ഒന്നിൽ നിന്നേയങ്ങ് തുടങ്ങി.’- വടക്കുകിഴക്കൻ ചൈനയിലെ തീരനഗരമായ ലിയോനിങ്ങിൽ നിന്നുള്ള 25 വയസുകാരിയായ യുവതി സമൂഹമാദ്ധ്യമത്തിൽ പങ്കുവെച്ച കുറിപ്പാണിത്.
‘എനിക്ക് ഒരു കാര്യം മാത്രമേ പറയാനുള്ളൂ. കമ്പനിയിലെ ജോലി വിട്ടശേഷം ഞാൻ വളരെ സന്തോഷവതിയാണ്. ശരീരത്തിന് ക്ഷീണം നേരിടുന്നുണ്ടെങ്കിലും മനസിന് ഏറെ സംതൃപ്തിയുണ്ട്.’- മറ്റൊരു യുവതിയുടെ വാക്കുകളാണിത്.
‘വൈറ്റ്-കോളർ ജോലിയിൽ നിന്നും ആത്മസംതൃപ്തി കിട്ടുന്നില്ല. ജോലിക്ക് വേണ്ടി ജീവിതം മാറ്റിവെച്ചിട്ടും ആകയൊരു ശൂന്യതയാണ്. എളുപ്പത്തിൽ മാറ്റിവെയ്ക്കാവുന്ന ഒരു സ്ക്രൂ പോലെയേ ഉള്ളൂ കമ്പനിയെ സംബന്ധിച്ച് നമ്മളൊക്കെ. പക്ഷേ ഇന്ന് കായികപരമായ ജോലിയാണെങ്കിലും മനസുഖം ലഭിക്കുന്നുണ്ട്.’- ലിയോനിങ്ങിൽ നിന്നുള്ള യുവതി കുറിച്ചു.
