പാലക്കാട്: ചോദ്യം ചെയ്യുന്നതിനിടെ കുഴഞ്ഞുവീണ കെ. വിദ്യയ്‌ക്ക് ആരോഗ്യ പ്രശ്‌നങ്ങളില്ലെന്ന് ഡോക്ടർമാർ. ആരോഗ്യം നിലവിൽ തൃപ്തികരമാണെന്നും നിർജലീകരണമാണ് ബോധക്ഷയത്തിന് കാരണമെന്നും പാലക്കാട് കോട്ടപ്പുറം ആശുപത്രിയിലെ ഡോക്ടർമാാർ പറഞ്ഞു. വിദ്യ ആശുപത്രി വിട്ടു.
അഗളി ഡിവൈഎസ്പി ഓഫീസിൽവെച്ചാണ് കുഴഞ്ഞുവീണത്. തുടർന്ന് പാലക്കാട് കോട്ടപ്പുറം ആശുപത്രിയിലേയ്‌ക്ക് മാറ്റുകയായിരുന്നു. അദ്ധ്യാപികയ്‌ക്കൊപ്പമിരുത്തി ചോദ്യം ചെയ്യാനിരിക്കെയാണ് വിദ്യ തലകറങ്ങി വീണത്. ഇതോടെ ചോദ്യംചെയ്യൽ നടപടികൾ തടസപ്പെട്ടു. കഴിഞ്ഞ ദിവസമാണ് വിദ്യയെ കോടതി പോലീസ് കസ്റ്റഡിയിൽ വിട്ടത്.
വ്യാജരേഖ ഉപയോഗിച്ച് ജോലി നേടിയ സംഭവത്തിൽ പോലീസ് കേസ് രജിസ്റ്റർ ചെയ്തതിന് പിന്നാലെ വിദ്യ ഒളിവിൽ പോകുകയായിരുന്നു. പിന്നാലെ 15 ദിവസത്തിന് ശേഷമാണ് വിദ്യയെ പിടികൂടാൻ സാധിച്ചത്. സംഭവത്തിൽ വിദ്യയെ പിടികൂടാതെ ഒളിച്ചുകളിക്കുന്നുവെന്ന ആരോപണങ്ങൾ ഉയരുന്നതിനിടെയാണ് പോലീസ് വിദ്യയെ കോഴിക്കോടുള്ള എസ്എഫ്ഐ നേതാവിന്റെ വീട്ടിൽ നിന്നും പിടികൂടിയത്. പിന്നാലെ അഗളിയിൽ എത്തിച്ച് കോടതിയിൽ ഹാജരാക്കി പോലീസ് കസ്റ്റഡിയിൽ വാങ്ങുകയായിരുന്നു.
എന്നാൽ ചോദ്യം ചെയ്യലിൽ വിദ്യ ആരോപിക്കപ്പെട്ട കുറ്റങ്ങൾ നിഷേധിച്ചിരുന്നു. വിദ്യ ചോദ്യംചെയ്യലിനോട് സഹകരിക്കുന്നുന്നില്ലെന്ന വിവരങ്ങളും പുറത്തുവന്നിരുന്നു.
Comments