തട്ടിപ്പിന്റെ പുതിയ മാർഗം ; ഡോക്ടറുടെ മകളെ ഹിപ്നോട്ടിസ് ചെയ്ത് മയക്കിയ ശേഷം സ്വർണ്ണാഭരണങ്ങൾ മോഷ്ടിച്ചു , സ്ത്രീ പിടിയിൽ

ഭോപ്പാൽ : തട്ടിപ്പിന് പുതിയ മാർഗങ്ങളുമായി കൊള്ളസംഘങ്ങൾ. ഭോപ്പാൽ ക്രൈംബ്രാഞ്ച് പോലീസ് അറസ്റ്റ് ചെയ്ത സ്ത്രീയാണ് വീട്ടുകാരെ ഹിപ്നോട്ടിസ് ചെയ്ത ശേഷം സ്വർണ്ണാഭരണങ്ങൾ മോഷ്ടിച്ചത് . ഹിപ്നോസിസിൽ വിദഗ്ധയായ മിശ്രി ബായി എന്ന സ്ത്രീയെ ശിവപുരി ജില്ലയിൽ നിന്നാണ് പോലീസ് അറസ്റ്റ് ചെയ്തത്. രാജ്ഗഡ് ജില്ലയിലെ ബോക്ഡി പച്ചോർ നിവാസിയായ മിശ്രി ബായി ഒരു ഡോക്ടറുടെ വീട്ടിൽ കയറിയാണ് മോഷണം നടത്തിയത് . ഇവർക്ക് പിന്നിലുള്ള കൊള്ളസംഘത്തെ പറ്റി പോലീസ് അന്വേഷിക്കുന്നുണ്ട് .

മെയ് 10 ന് ഭോപ്പാലിലെ ടിടി നഗർ ഏരിയയിൽ താമസിക്കുന്ന ഡോക്ടർ അരവിന്ദ് യാദവിന്റെ വീട്ടിലാണ് മോഷണം നടന്നത് . സംഭാവന ചോദിക്കാനെന്ന വ്യാജേന മിശ്രി ബായി വീട്ടിലെത്തിയപ്പോൾ ഡോ. യാദവിന്റെ മകൾ ചെയിൻഖല മാത്രമാണ് വീട്ടിൽ ഉണ്ടായിരുന്നത് . ചെയിൻഖലയെ ഹിപ്നോട്ടിസ് ചെയ്ത ശേഷം വീട്ടിൽ നിന്ന് സ്വർണ്ണാഭരണങ്ങൾ മോഷ്ടിച്ചു കടക്കുകയായിരുന്നു . ഈ ആഭരണങ്ങൾ സംഘാംഗങ്ങൾ വഴി മിശ്രി ബായി വിൽപ്പന നടത്തി . ഡോക്ടർ നൽകിയ പരാതിയുടെ അടിസ്ഥാനത്തിൽ വിശദമായ അന്വേഷണം നടത്തിയ പോലീസ് മിശ്രി ബായിയുടെ വീട് കണ്ടെത്തി . മകളെയും ,മകനെയും അറസ്റ്റ് ചെയ്യാൻ പോലീസ് നീക്കം നടത്തിയതിനു പിന്നാലെയാണ് ഒളിവിൽ കഴിഞ്ഞ മിശ്രി പുറത്തെത്തിയത് .