വിജയ് നായകനാകുന്ന പുതിയ ചിത്രമാണ് ലിയോ. ലോകേഷ് കനകരാജ് സംവിധാനം ചെയ്യുന്ന ചിത്രത്തിലെ ഒരു ഗാനം കഴിഞ്ഞ ദിവസമായിരുന്നു റിലീസ് ചെയ്തത്. ഇപ്പോഴിതാ ഈ പാട്ടിനെതിരെ പരാതി നൽകി യുവാവ്. കൊരുക്കുപ്പേട്ട സ്വദേശി സെൽവമാണ് പോലീസിൽ പരാതി നൽകിയിരിക്കുന്നത്. ഈ ഗാനം മയക്കുമരുന്ന് കടത്തിനെ പ്രോത്സാഹിപ്പിക്കുന്നുവെന്ന് ചൂണ്ടിക്കാട്ടിയാണ് യുവാവ് പോലീസിൽ പരാതി നൽകിയിരിക്കുന്നത്.
കഴിഞ്ഞ ദിവസമാണ് ഇയാൾ ഓൺലൈനായി പരാതി സമർപ്പിച്ചത്. ഇന്ന് രാവിലെ ഇയാൾ സ്റ്റേഷനിൽ നേരിട്ടെത്തിയും പരാതി സമർപ്പിച്ചിരുന്നു. മയക്കുമരുന്ന് നിരോധന നിയമപ്രകാരം ഇവർക്കെതിരെ നടപടിയെടുക്കണമെന്ന് പരാതിയിൽ പറയുന്നു.
മയക്കുമരുന്നിനെതിരെ ക്യാമ്പൈനുമായി തമിഴ് താരങ്ങൾ രംഗത്ത് വന്നിരുന്നു. നടൻ കാർത്തിയടക്കം പല താരങ്ങളും ഈ പരിപാടികളിൽ പങ്കെടുക്കുന്നുമുണ്ട്. ഈ സാഹചര്യത്തിലാണ് ഇത്തരത്തിൽ ലഹരിയെ പ്രോത്സാഹിപ്പിക്കുന്ന ഗാനം പുറത്തു വന്നിരിക്കുന്നതെന്നും സെൽവം പറയുന്നു.
സോണി മ്യൂസിക് സൗത്തിന്റെ യൂട്യൂബ് ചാനലിലൂടെയാണ് ഗാനം പുറത്തുവിട്ടത്. ഗാനം ആലപിച്ചിരിക്കുന്നത് വിജയ് തന്നെയാണ്. അനിരുദ്ധാണ് ഗാനത്തിന്റെ സംഗീതം.
Comments