തിയേറ്റർ പാർക്കിംഗിൽ നിന്ന് ബൈക്ക് മോഷണം; പിടിക്കപ്പെടാതിരിക്കാൻ വാഹന രജിസ്‌ട്രേഷൻ നമ്പർ മാറ്റി സഞ്ചാരം; നേരെ ചെന്ന് കയറിയത് പോലീസിന് മുന്നിൽ

കോഴിക്കോട്: നഗരത്തിലെ സംഗം തിയേറ്ററിന് സമീപം പാർക്കിംഗിൽ പാർക്ക് ചെയ്തിരുന്ന ഇരുചക്രവാഹനം മോഷണം നടത്തിയ പ്രതി അറസ്റ്റിൽ. തലശ്ശേരി സ്വദേശി ഇസ്മയിൽ ആണ് ടൗൺ പോലീസ് ബീച്ചിൽ നടത്തിയ വാഹന പരിശോധനയിൽ അറസ്റ്റിലായത്. ഇരുചക്രവാഹനം പ്രതിയിൽ നിന്നും പൊലീസ് കണ്ടെടുത്തു. ഡെപ്യൂട്ടി പോലീസ് കമ്മീഷണർ കെ ഇ ബൈജുവിന്റെ നിർദ്ദേശാനുസരണം മോഷണം തടയുന്നതിന് വേണ്ടി പ്രത്യേക വാഹന പരിശോധന നടക്കവേയാണ് പ്രതി പിടിയിലായത്.

ബൈക്ക് മോഷ്ടിച്ചതിന് ശേഷം പോലീസ് തിരിച്ചറിയാതിരിക്കുന്നതിനായി വാഹനത്തിന്റെ നമ്പർ മാറ്റിയായിരുന്നു പ്രതി നഗരത്തിലൂടെ സഞ്ചരിച്ചിരുന്നത്. സംശയം തോന്നിയതിനെ തുടർന്ന് നടത്തിയ പരിശോധനയിലാണ് പിടിക്കപ്പെടുന്നത്. വെള്ളയിൽ പോലീസ് സ്റ്റേഷനിൽ മുൻപ് മൊബൈൽ ഫോൺ മോഷണം നടത്തിയ കേസിലും ഇയാൾ പ്രതിയാണ്. സബ്ബ് ഇൻസ്‌പെക്ടർ സുഭാഷ് ചന്ദ്രൻ അറസ്റ്റിന് നേതൃത്വം നൽകി. സിറ്റി ക്രൈം സ്‌ക്വാഡ് അംഗങ്ങളായ എം ഷാലു, സി കെ സുജിത്ത്, ഷാഫി പി ടൗൺ പോലീസ് സ്റ്റേഷനിലെ വിജീഷ്, പ്രവീൺ കുമാർ എന്നിവരുടെ സംഘമാണ് പ്രതിയെ പിടികൂടിയത്.