കാസർകോട് : കാസർകോട് കേന്ദ്ര സർവ്വകലാശാലയിൽ ദേശീയ വിദ്യാഭ്യാസനയത്തിന്റെ ഭാഗമായി ആരംഭിച്ച ജ്ഞാനോത്സവം പരിപാടി സമാപിച്ചു. വിദ്യാഭ്യാസത്തിലൂടെ ആത്മനിർഭർ ഭാരതമെന്ന പ്രമേയം ഉയർത്തിപിടിച്ചാണ് കേന്ദ്രസർവകലാശാല വിദ്യാഭ്യാസവകുപ്പും വിദ്യാഭ്യാസ സംരക്ഷണസമിതിയും സംയുക്തമായി ജ്ഞാനോത്സവം പരിപാടിക്ക് നേതൃത്വം നൽകിയത്. ദേശീയ വിദ്യാഭ്യാസ നയം വെല്ലുവിളിയല്ലെന്നും അവസരമായി എടുക്കണമെന്നുമുള്ള സന്ദേശം ഉയർത്തിയാണ് പരിപാടിക്ക് സമാപനമായത്. ഗവർണർ ആരിഫ് മുഹമ്മദ് ഖാനായിരുന്നു പരിപാടി ഉദ്ഘാടനം ചെയ്തത്
മൂന്നു ദിവസം നീണ്ടു നിന്ന പരിപാടിയിൽ വിദ്യാർത്ഥികളുടെ സമഗ്രവികസനം മുൻനിർത്തിയുള്ള നിരവധി പരിശീലന കാലാംശങ്ങൾ അരങ്ങേറി. നൂതന വിദ്യാഭ്യാസ ആശയങ്ങളുടെ പ്രദർശനവും ഇത് പ്രമേയമാക്കിയുള്ള സംവാദവും പരിപാടിയുടെ മുഖ്യ ആകർഷണമായിരുന്നു. വിദ്യാഭ്യാസത്തിലൂടെ രാജ്യത്തിന്റെ സംസ്കാരം പുനരുജ്ജീവിപ്പിക്കാൻ പുതിയ ദേശീയ വിദ്യാഭ്യാസ നയത്തിലൂടെ സാധിക്കുമെന്നാണ് ചർച്ചകളിൽ നിന്നും ഉയർന്നുവന്ന പൊതുവായ അഭിപ്രായം.
തിരഞ്ഞെടുക്കപ്പെട്ട 50-ഓളം സ്കൂളുകളും അദ്ധ്യാപകരും പരിശീലന സ്ഥാപനങ്ങളും ഉന്നതവിദ്യാഭ്യാസ സ്ഥാപനങ്ങളും പരിപാടിയുടെ ഭാഗമായി. വിദ്യാർത്ഥികളുടെ സമഗ്രവികാസം, പരിസ്ഥിതി പ്രവർത്തനം, ഭാരതീയ വിദ്യാഭ്യാസ സമ്പ്രദായവും ഭാഷയും, തൊഴിൽ നൈപുണ്യം, സമഗ്ര മൂല്യനിർണയം എന്നീ അഞ്ച് പ്രമേയങ്ങളുടെ അടിസ്ഥാനത്തിൽ തയാറാക്കിയ മാതൃകകളും പരിപാടിയുടെ ഭാഗമായി പ്രദർശിപ്പിച്ചിരുന്നു.
Comments