ഗുരുവായൂരപ്പന് വീണ്ടും കാണിക്കയുമായി മഹീന്ദ്ര; ഇത്തവണ സമർപ്പിച്ചത് വിപണിയിൽ ഏറ്റവും ഡിമാന്റുള്ള എസ് യു വി

തൃശുർ: ഗുരുവായൂരപ്പന് നേർച്ചയായി മഹീന്ദ്രയുടെ ന്യൂ ജനറേഷൻ എസ് യു വി സമർപ്പിച്ച് കമ്പനി. മഹീന്ദ്രയുടെ ഏറ്റവും പുതിയ മോഡലായ  XUV700 AX7 ഓട്ടോമേറ്റിക്ക് കാറാണ് ഭഗവാന് സമർപ്പിച്ചത്.ഇന്ന് ഉച്ചപൂജയ്‌ക്ക് ശേഷമാണ് വാഹന സമർപ്പണ ചടങ്ങ് നടന്നത്. കിഴക്കേ നടയിൽ നടന്ന ചടങ്ങിൽ ദേവസ്വം ചെയർമാൻ ഡോ. വി കെ വിജയന് വാഹനത്തിന്റെ താക്കോൽ മഹീന്ദ്രാ ആന്റ് മഹീന്ദ്രാ ലിമിറ്റഡ് ആട്ടോമോറ്റീവ് ടെക്‌നോളജി ആന്റ് പ്രോഡക്ട് ഡെവലപ്‌മെന്റ് പ്രസിഡന്റ് ആർ.വേലുസ്വാമി കൈമാറി.

വൈറ്റ് കളർ ആട്ടോമാറ്റിക് പെട്രോൾ എഡിഷൻ എക്‌സ് യു വി ആണ് ക്ഷേത്രത്തിന് കാണിക്കയായി നൽകിയിരിക്കുന്നത്. വാഹനത്തിന്റെ ഓൺ റോഡ് വില 28,85853 രൂപയോളമാണ്. വാഹനവിപണിയിൽ കൂടുതൽ വിറ്റഴിഞ്ഞ മഹീന്ദ്രയുടെ വാഹനമാണ് എക്‌സ്‌യുവി.

2021-ലാണ് ഇതിനുമുൻപ് ഗുരുവായൂരപ്പന് മഹീന്ദ്ര കാണിക്കയായി വാഹനം സമർപ്പിച്ചത്. വിപണിയിൽ ഹിറ്റായ ഥാർ ലിമിറ്റഡ് എഡിഷൻ ആയിരുന്നു അന്ന് മഹീന്ദ്ര ആന്റ് മഹീന്ദ്ര കമ്പനി സമർപ്പിച്ചത്. പിന്നാലെ ഇത് ദേവസ്വം ബോർഡ് ലേലം ചെയ്യുകയും ചെയ്തിരുന്നു. അടിസ്ഥാനവിലയുടെ മൂന്നിരട്ടി തുകയ്‌ക്കായിരുന്നു ഥാർ അന്ന് ലേലത്തിൽ പോയത്.