ടാറ്റയ്‌ക്ക് ഒരു പൊൻതൂവൽ കൂടി; ഐഫോൺ നിർമിക്കുന്ന ആദ്യ ഇന്ത്യൻ കമ്പനിയാവാനുള്ള കുതിപ്പിൽ ടാറ്റ..

വിസ്‌ട്രോൺ ഫാക്ടറി കരാർ അടുത്തതോടെ ഐഫോൺ നിർമിക്കുന്ന ആദ്യ ഇന്ത്യൻ കമ്പനിയാവാനുള്ള തയ്യാറെടുപ്പിലാണ് ടാറ്റ. ഇന്ത്യയ്‌ക്കും മറ്റ് ആഗോള വിപണികൾക്കുമായി ഐഫോൺ എത്തിക്കുന്ന ആദ്യ ഇന്ത്യൻ കമ്പനിയായി ടാറ്റ ഉടൻ മാറിയേക്കാം. തായ്‌വാൻ ആസ്ഥാനമായുള്ള വിസ്‌ട്രോൺ കോർപ്പറേഷന്റെ കർണാടകയിലെ ഫാക്ടറി ഓഗസ്റ്റിലോടുകൂടി ഏറ്റെടുക്കാനുള്ള നീക്കത്തിലാണ് ടാറ്റ. കരാർ അന്തിമമായി കഴിഞ്ഞാൽ കമ്പനിയുടെ മേൽനോട്ടം ടാറ്റ വഹിക്കും. ടാറ്റയുടെ കരാർ ഇന്ത്യൻ ഹാർഡ്‌വെയർ നിർമാണ മേഖലയിൽ പുതിയ മാറ്റങ്ങൾ കൊണ്ട് വരികയും ഇന്ത്യയുടെ യശസ് ഉയർത്തുകയും ചെയ്യുമെന്നാണ് വിലയിരുത്തൽ.

പുതിയ റിപ്പോർട്ടുകൾ പ്രകാരം വിസ്‌ട്രോൺ ഫാക്ടറിയ്‌ക്ക് ഏകദേശം 4000 കോടി വിപണി മൂല്യമുണ്ട്. കൂടാതെ 10,000 തൊഴിലവസരങ്ങളും ടാറ്റ ഈ കമ്പനിയെ ഏറ്റെടുക്കുകയാണെങ്കിൽ ഇന്ത്യക്കാർക്ക് ലഭിക്കും. അടുത്ത ഉത്പാദനകേന്ദ്രം എന്ന നിലയിൽ ആപ്പിൾ കമ്പനിയും ഇന്ത്യയെ നിരന്തരമായി സമീപിക്കുന്നുണ്ട്. ഐഫോണുകളുടെ ഉത്പാദനം 2023ൽ 7 ശതമാണെന്നും അതിൽ നിന്ന് 2025-ഓടെ 18 ശതമാനമാക്കി ഉയർത്തുമെന്നും റിപ്പോർട്ടുകൾ സൂചിപ്പിക്കുന്നു.