കൊച്ചി: സഹൽ അബ്ദുൾ സമദിന് പിന്നാലെ കെ പി രാഹുലും കൊമ്പൻമാരുടെ നിരയിൽ നിന്ന് പോകുന്നുവെന്ന ആരാധകരുടെ ആശങ്കയ്ക്ക് വിരാമമായി. 17 ാം നമ്പർ ജഴ്സിയിൽ മഞ്ഞപ്പടയുടെ സൂപ്പർ താരമായി വളർന്ന കെ.പി. രാഹുലും ബ്ലാസ്റ്റേഴ്സ് വിടുമോയെന്ന ആശങ്കയെ ഗാലറിക്കു പുറത്തേക്കു പറത്തി രാഹുൽ ടീമിനൊപ്പം പരിശീലനം ആരംഭിച്ചു.
17ാം നമ്പർ ജഴ്സിക്കു പകരം ഐഎസ്എൽ 2023-2024 സീസണിൽ 7 ആണ് താരത്തിന്റെ പുതിയ നമ്പർ! സഹൽ പോയതോടെ ബ്ലാസ്റ്റേഴ്സ് നിരയുടെ മലയാളി താരമുഖം ആകാനൊരുങ്ങുകയാണു രാഹുൽ. ജഴ്സി നമ്പർ മാറ്റം കളത്തിൽ രാഹുലിന്റെ റോളിൽ മാറ്റം വരുത്തുമോയെന്ന ചോദ്യവും ബാക്കിയാണ്. വിങ്ങുകളിലൂടെ കുതിച്ചു പാഞ്ഞ് എതിർ ടീമിനെ മുൾമുനയിൽ നിർത്തിയ രാഹുൽ ഇക്കുറി സ്ട്രൈക്കർ റോളിലാകും കൊമ്പൻമാർക്ക് വേണ്ടി ബൂട്ടണിയുക.
അറ്റാക്കിങ് മിഡ്ഫീൽഡറായിരുന്ന പ്യൂട്ടിയയാണു നമ്പർ 7 ജഴ്സിയുടെ പഴയ ഉടമ. പ്യൂട്ടിയ കഴിഞ്ഞ സീസൺ പൂർത്തിയാകും മുൻപേ മോഹൻ ബഗാനിലേക്കു മാറിയിരുന്നു. 7 ാം നമ്പറിനോടു പണ്ടേ ഇഷ്ടമുണ്ടായിരുന്ന രാഹുൽ പ്യൂട്ടിയയോട് ആ ഇഷ്ടം പറയുകയും ചെയ്തിരുന്നു. തൃശൂർ പറപ്പൂക്കര സ്വദേശിയായ രാഹുൽ 2019 മുതൽ കേരള ബ്ലാസ്റ്റേഴ്സ് എഫ് സിയുടെ സീനിയർ ടീമിൽ അംഗമാണ്. റൈറ്റ് വിംഗറായി കേരള ബ്ലാസ്റ്റേഴ്സ് എഫ് സിക്കു വേണ്ടി കളിക്കുന്ന കെ. പി. രാഹുൽ 2022 – 2023 സീസണിൽ 22 മത്സരങ്ങളിൽ നിന്ന് മൂന്ന് ഗോൾ നേടുകയും രണ്ട് ഗോളിന് അസിസ്റ്റ് നടത്തുകയും ചെയ്തിരുന്നു. കേരള ബ്ലാസ്റ്റേഴ്സ് എഫ് സിക്കു വേണ്ടി ആകെ 57 മത്സരങ്ങളിൽ ബൂട്ടണിഞ്ഞ കെ. പി. രാഹുൽ എട്ട് ഗോളും നാല് അസിസ്റ്റും നടത്തിയിട്ടുണ്ട്.
