ടെക് ലോകത്തെ നെടുംതൂണുകളായ രണ്ട് വ്യക്തികളാണ് മാർക് സക്കർബർഗും, ഇലോൺ മസ്‌കും. ജനപ്രിയ സമൂഹ മാദ്ധ്യമമായ ട്വിറ്ററിന് പുതിയൊരു എതിരാളിയായി ബർഗ് ഇൻസ്റ്റഗ്രാമിന്റെ ത്രെഡ്‌സ് ആപ്പ് പുറത്തിറക്കിയപ്പോൾ മസ്‌കും ബർഗും തമ്മിലുള്ള പോരാട്ടക്കളം വാർത്തകളിൽ നിറഞ്ഞിരുന്നു. അതേസമയം വഴക്കുകളൊക്കെ നിർത്തി വച്ച് കടലിൽ ചിരിച്ചുല്ലസിക്കുന്ന ടെക് ടൈറ്റനുകളുടെ ചിത്രങ്ങൾക്കാണ് സമൂഹ മാദ്ധ്യമ ഉപഭോക്താക്കൾ ഇപ്പോൾ സാക്ഷ്യം വഹിച്ചിരിക്കുന്നത്.
ഒരു ബീച്ചിൽ ചിരിച്ചുല്ലസിക്കുന്ന ഇലോൺ മസ്‌കിന്റെയും മാർക് സക്കർബർഗിന്റെയും ചിത്രങ്ങൾ ‘ശുഭപര്യവസാനം’ എന്ന അടിക്കുറിപ്പോടെ സർ ഡോഗ് ഓഫ് ദി കോയിൻ എന്നറിയപ്പെടുന്ന ഒരുട്വിറ്റർ ഉപഭോക്താവാണ് പങ്കിട്ടത്. എന്നാൽ സംഭവത്തിന്റെ നിജസ്ഥിതി അതല്ലെന്ന് മാത്രം. ബീച്ചിൽ തങ്ങളുടെ അവധി ദിവസങ്ങൾ ആഘോഷിക്കുന്നത് പോലെ എടുത്ത ഈ ചിത്രങ്ങൾക്കു പിന്നിൽ ആർട്ടിഫിഷ്യൽ ഇന്റലിജൻസിന്റെ കറുത്ത കൈകളാണുള്ളത്. പോസ്റ്റ് ചെയ്ത് നിമിഷ നേരങ്ങൾക്കുള്ളിൽ നിരവധി ആളുകളാണ് ചിത്രം കാണുകയും പങ്കിടുകയും ചെയ്തത്. വൈറലായ ചിത്രത്തിൽ ഇലോൺ മസ്‌ക് ചിരിക്കുന്ന ഇമോജി നൽകിയതോടെ ചിത്രം ഇപ്പോൾ സമൂഹ മാദ്ധ്യമങ്ങളിൽ നിറഞ്ഞാടുകയാണ്. 1.3 മില്ല്യൺ ലൈക്കുകളാണ് ചിത്രത്തിന് നിമിഷ നേരംകൊണ്ട് നേടാൻ സാധിച്ചത്.
Comments