പ്രായമായവരിലെ പനി സൂക്ഷിച്ചേ തീരു; ഈ ലക്ഷണങ്ങൾ കണ്ടാൽ പ്രത്യേക ശ്രദ്ധ നൽകണം

പനി പിടിപ്പെട്ട് കഴിഞ്ഞാൽ ഏറ്റവും കൂടുതൽ ശ്രദ്ധിക്കേണ്ടത് പ്രായമായവരാണ്. പ്രായമായവർക്ക് രോഗപ്രതിരോധ ശേഷി കുറവായതിനാൽ പെട്ടെന്ന് പനി പിടിപ്പെടാനുള്ള സാധ്യത കൂടുതലാണ്. പനിയെ പ്രതിരോധിക്കാനുള്ള ആരോഗ്യ ക്ഷമത പലപ്പോഴും പ്രായമായവർക്ക് ഉണ്ടാകാറില്ല.

അണുബാധയ്‌ക്കെതിരെ പ്രവർത്തിക്കാനുള്ള ശരീരത്തിന്റെ ഏറ്റവും ഫലപ്രദമായ മാർഗങ്ങളിലൊന്നാണ് പനി. ഉയർന്ന ശരീര താപനില രോഗപ്രതിരോധ സംവിധാനത്തെ കൂടുതൽ ശക്തമായി പ്രതിരോധിക്കാൻ സഹായിക്കുന്നതിലൂടെ ശരീരത്തിനുള്ളിൽ കടന്നിരിക്കുന്ന രോഗകാരികളായ സൂക്ഷ്മാണുക്കൾ നശിക്കുന്നു.

98.6 ഡിഗ്രിയാണ് ഒരു മനുഷ്യന്റെ സാധാരണ താപനില. ഇത് 100.4 ഡിഗ്രിയായി ഉയരുന്ന സാഹചര്യത്തിലാണ് പനി സ്ഥിരീകരിക്കുന്നത്. എന്നാൽ 104 ഡിഗ്രിയായി ശരീര താപനില ഉയരുകയാണെങ്കിൽ ഡോക്ടറെ സമീപിക്കുകയും ചികിത്സ ഉറപ്പാക്കുകയും വേണം. ബോധം നഷ്ടമാവുക, കഴുത്ത് അനക്കാൻ കഴിയാതെയാകുക, ശ്വാസമെടുക്കാൻ ബുദ്ധിമുട്ട് തോന്നുക, ശരീരമാസകലം വേദനയുണ്ടാവുക, ശരീരത്തിൽ തടിപ്പുണ്ടാകുക എന്നിവ പനിയുള്ള സമയത്ത് ഉണ്ടാകുകയാണെങ്കിൽ കൃത്യമായ ചികിത്സ സ്വീകരിക്കണം.

റൂമറ്റോയ്ഡ് ആർത്രൈറ്റിസ് പോലുള്ള രോഗങ്ങൾ, മരുന്നുകളുടെയോ വാക്‌സിനുകളുടെയോ റിയാക്ഷൻ, ക്യാൻസർ എന്നീ രോഗങ്ങളുടെ ആരംഭം കടുത്ത പനിയിലൂടെയാണ്. വിയർക്കുക, കഠിനമായ തണുപ്പ് അനുഭവപ്പെടുക, തലവേദന, പേശി വേദന, അസ്വസ്ഥത, ബലഹീനത, ശരീരം വിറയ്‌ക്കുക എന്നീ ലക്ഷണങ്ങളും ഏറ്റവും കടുത്ത പനിയുടെ ലക്ഷണങ്ങളാണ്.

പനി ഒരു പരിധി വരെ അപകടകാരിയല്ലെങ്കിലും കൃത്യമായി ചികിത്സ ലഭിച്ചില്ലെങ്കിൽ ജീവൻ തന്നെ നഷ്ടമാകാൻ കാരണമാകും. പനി പിടിച്ച് കഴിഞ്ഞാൽ ശരീരത്തിലെ താപനില സാധാരണമാക്കുന്നതിനും നിർജലീകരണം തടയുന്നതിനും ധാരാളം വെള്ളം കുടിക്കണം, പെട്ടെന്നുള്ള ദഹനത്തിനായി കട്ടി കുറഞ്ഞ ഭക്ഷണങ്ങൾ കഴിക്കണം. പനി പിടിച്ചാൽ ശരീരത്തിന് ആവശ്യമായ വിശ്രമം നൽകാനും ശ്രദ്ധിക്കണം.