കുളുവിലെ മലാന അണക്കെട്ടിന്റെ ഗേറ്റിന് തകരാർ; ജാഗ്രതാ നിർദ്ദേശം നൽകി പോലീസ്

ഡെറാഡൂൺ: ഹിമാചൽ പ്രദേശിലെ കുളു ജില്ലയിലെ 86 മെഗാവാട്ട് മലാന ജലവൈദ്യുത പദ്ധതി അണക്കെട്ടിന് തകരാർ സംഭവിച്ചതിനാൽ ജാഗ്രതാ നിർദ്ദേശം പുറപ്പെടുവിച്ച് പോലീസ് ഗേറ്റുകളുടെ തകരാറിനെത്തുടർന്ന് ജലം കവിഞ്ഞൊഴുകാൻ തുടങ്ങിയത് മലാന ഗ്രാമത്തെയാകെ പരിഭ്രാന്തിയിലാഴ്‌ത്തിയിരിക്കുകയാണ്. ഈ സാഹചര്യത്തിൽ അണക്കെട്ട് പൊട്ടാനുള്ള സാധ്യത കണക്കിലെടുത്ത് പാർവതി നദിയുടെ തീരത്തുള്ള ജനവാസ മേഖലകളിൽ ജാഗ്രതാ നിർദ്ദേശം നൽകുകയും നിരവധി ജനവാസ കേന്ദ്രങ്ങൾ ഒഴിപ്പിക്കുകയും ചെയ്‌തിട്ടുണ്ടെന്നും കുളു ഡെപ്യൂട്ടി കമ്മീഷണർ അശുതോഷ് ഗാർഗ് പറഞ്ഞു.

ജീവഹാനിയോ നാശനഷ്ടങ്ങളോ ഉണ്ടാകാതിരിക്കാൻ ഗേറ്റ് ഉടൻ പ്രവർത്തിപ്പിക്കാൻ പവർ പ്രോജക്ട് അതോറിറ്റിക്ക് നിർദ്ദേശം നൽകിയിട്ടുണ്ടെന്നും കുളു ഡെപ്യൂട്ടി കമ്മീഷണർ അറിയിച്ചു. അതേസമയം ഹിമാചൽ പ്രദേശിൽ കാലവർഷക്കെടുതി തുടരുന്ന സാഹചര്യത്തിൽ കാലാവസ്ഥാ വിദഗ്ധർ പുതിയ കാലാവസ്ഥാ മുന്നറിയിപ്പ് നൽകിയിരുന്നു.

ഇന്ത്യൻ കാലാവസ്ഥാ വകുപ്പ് തിങ്കളാഴ്ച ഹിമാചൽ പ്രദേശിൽ ഓറഞ്ച് അലർട്ട് പുറപ്പെടുവിച്ചിരുന്നു. ജൂലൈ 26 മുതൽ 28 വരെ മൂന്ന് ദിവസത്തേക്ക് സംസ്ഥാനത്ത് കനത്ത മഴയ്‌ക്ക് സാധ്യതയുണ്ടെന്ന് പ്രവചിക്കുകയും ചെയ്തിട്ടുണ്ട്.