വർണാഭമായ ഉദ്ഘാടനം സെൻ നദിയിൽ; മത്സരയിനമായി ബ്രേക്ക് ഡാൻസ് അരങ്ങേറുമ്പോൾ കരാട്ടെയും ബേസ് ബോളും ഉണ്ടാകില്ല; പാരീസ് ഒളിമ്പിക്സിന് ഇനി ഒരു വർഷം

പാരീസ് ഒളിമ്പിക്‌സിന് ഇനി ഒരുവർഷം. 33-മത് ഒളിമ്പിക്‌സിന് 2024 ജൂലൈ 26ന് പാരീസിൽ തുടക്കമാകും. ലോകത്തിന്റെ വിവിധ ഭാഗങ്ങളിൽ നിന്നായി 10000-ത്തിലധികം കായിക താരങ്ങളും ലക്ഷക്കണക്കിന് താരങ്ങളും പങ്കെടുക്കും. 32 കായിക ഇനങ്ങളിലെ 48 വിഭാഗങ്ങളിലായി 329 മത്സരങ്ങളാണ് അരങ്ങേറുക. പാരീസ് ഒളിമ്പിക്‌സിന് പ്രത്യേകതകളും ഏറെയാണ്.

സ്റ്റേഡിയത്തിനുളളിലാകില്ല ഇത്തവണത്തെ ഒളിമ്പിക്‌സിന്റെ ഉദ്ഘാടന ചടങ്ങ്. സെൻ നദിയിൽ ബോട്ടിലാകും ഉദ്ഘാടന മത്സരത്തോട് അനുബന്ധിച്ചുളള മാർച്ച് പാസ്റ്റ് നടക്കുക. ഐഫൽ ഗോപുരത്തിന് സമീപത്ത് ഉയർത്തുന്ന പോഡിയത്തിൽ ദീപം തെളിയിക്കുന്നതോടെ ഒളിമ്പിക്‌സിന് തുടക്കമാകും. ഐഫൽ ഗോപുരത്തിന് മുന്നിൽ തയ്യാറാക്കുന്ന പ്രത്യേക വേദിയിൽ മെഡൽ ജേതാക്കളെ അവതിരിപ്പിക്കും. വിജയികളുടെ വിക്ടറി പരേഡും ഐഫൽ ഗോപുരത്തെ സാക്ഷി നിർത്തിയാകും നടക്കുക.

ചരിത്രത്തിലാദ്യമായാണ് ഒളിമ്പിക്‌സ് വേദിയിൽ ബ്രേക്ക് ഡാൻസ് മത്സരം അരങ്ങേറുക. ടോക്കിയോയിൽ തുടങ്ങിയ സ്‌കേറ്റ്‌ബോർഡിംഗ്, സർഫിംഗ് സ്‌പോർട്‌സ് ക്ലൈംബിംഗ് എന്നിവ തുടരും. എന്നാൽ ടോക്കിയോയിൽ ഉണ്ടായിരുന്ന കരാട്ടെ, ബേസ്‌ബോൾ എന്നിവ പാരീസിൽ ഉണ്ടാകില്ല.

ഫ്രഞ്ച് ഓപ്പൺ ടെന്നിസ് നടക്കുന്ന റൊളാങ് ഗാരോസും പിഎസ്ജി യുടെ ഹോം മൈതാനമായ പ്രിൻസസ് പാർക്കും ഉൾപ്പെടെയുവ മത്സരങ്ങൾക്കു വേദിയാവും. ഫ്രാൻസിലെ വിവിധ നഗരങ്ങളിലായി ആകെ മുപ്പത്തഞ്ചോളം വേദികളുണ്ട്. ഇതിൽ പതിനഞ്ചും തലസ്ഥാന നഗരമായ പാരിസിൽ തന്നെയാണ്. ഫ്രാൻസിനു കീഴിലുള്ള ദ്വീപസമൂഹമായ തഹിതിയിലും ഒളിംപിക്‌സിനുണ്ടാകും.