തിരുവനന്തപുരം: സംസ്ഥാനത്ത് പ്ലസ് ടൂ പഠനത്തിനൊപ്പം ലേണേഴ്‌സും നൽകാനൊരുങ്ങുന്നുവെന്ന് ഗതാഗത മന്ത്രി ആന്റണി രാജു. പ്ലസ്ടൂ പരീക്ഷ പാസാകുന്നവർക്ക് ലേണേഴ്‌സ് ടെസ്റ്റ് ഒഴിവാക്കി നേരിട്ട് ലൈസൻസ് എടുക്കാനാകുന്ന പദ്ധതിയാണ് പരിഗണനയിലുള്ളത്. ഇതിന്റെ ഭാഗമായി റോഡ് സുരക്ഷാ അവബോധം സ്‌കൂൾ തലത്തിൽ തന്നെ ആരംഭിക്കുന്നതിനായി ഇക്കാര്യങ്ങൾ ഹയർസെക്കൻഡറി വിഭാഗം പാഠ്യപദ്ധതിയിൽ ഉൾപ്പെടുത്തുന്നതിനുള്ള പദ്ധതികളാണ് പരിഗണനയിലുള്ളത്. ഇത്തരത്തിൽ പുസ്തകങ്ങൾ തയാറാക്കി കഴിഞ്ഞതായും മുഖ്യമന്ത്രിക്കും വിദ്യാഭ്യാസ മന്ത്രിക്കും സമർപ്പിച്ചതായും മന്ത്രി വ്യക്തമാക്കി.
സംസ്ഥാനത്ത് പ്ലസ്ടു പാസാകുന്നവർക്ക് വിദ്യാഭ്യാസ സർട്ടിഫിക്കറ്റിനൊപ്പം ലേണേഴ്‌സ് സർട്ടിഫിക്കറ്റ് നൽകാനാണ് പദ്ധതിയിട്ടിരിക്കുന്നത്. പ്ലസ് വൺ, പ്ലസ് ടു ക്ലാസുകളിൽ റോഡ് നിയമവും ഗതാഗത നിയമവും ഉൾപ്പെടെ ലേണേഴ്‌സ് സർട്ടിഫിക്കറ്റിന് ആവശ്യമായ ക്ലാസുകൾ സംഘടിപ്പിക്കും. പാഠ്യപദ്ധതിയിൽ ഉൾപ്പെടുത്തുന്നതോടെ ചെറുപ്രായത്തിൽ തന്നെ കുട്ടികളിൽ ഗതാഗത നിയമത്തേക്കുറിച്ച് ബോധവാന്മാരാകുമെന്നും ഇത് വാഹനാപകടങ്ങൾ കുറയ്‌ക്കാൻ സഹായകമാകുമെന്നും മന്ത്രി വ്യക്തമാക്കി.
ഇംഗ്ലീഷ് മലയാളം എന്നീ ഭാഷകളിലാണ് പുസ്തകങ്ങൾ തയാറാക്കിയിരിക്കുന്നത്. റോഡ് മര്യാദകൾ, അടയാളങ്ങൾ എന്നിവയെല്ലാം പാഠ്യപദ്ധതിയിൽ ഉൾപ്പെടുത്തിയിട്ടുണ്ട്. ഇതിലൂടെ ലേണേഴ്‌സ് സർട്ടിഫിക്കറ്റ് നേടുന്നതിനായി നിലവിലുള്ള ക്രമക്കേടുകൾ കുറയ്‌ക്കുന്നതിനും റോഡ് നിയമങ്ങളെക്കുറിച്ച് വിദ്യാർത്ഥികളിൽ അവബോധം സൃഷ്ടിക്കാനും സഹായിക്കും.
