പുതുപ്പള്ളിയിൽ ഇടത് സ്ഥാനാർത്ഥി ജെയ്ക് തന്നെ; ഔദ്യോഗിക പ്രഖ്യാപനം നാളെ

തിരുവനന്തപുരം: പുതുപ്പള്ളിയിൽ ഇടത് മുന്നണിക്കായി ജെയ്ക് സി തോമസ് തന്നെ മത്സരിക്കും. തിരുവനന്തപുരത്ത് ചേർന്ന സിപിഎം സംസ്ഥാന സെക്രട്ടറിയേറ്റിന്റേതാണ് തീരുമാനം. ഔദ്യോഗിക പ്രഖ്യാപനം നാളെ കോട്ടയത്ത് നടത്തും. സ്ഥാനാർത്ഥി പ്രഖ്യാപനം വൈകുന്നത് സംബന്ധിച്ച് സിപിഎം വിമർശനം നേരിടുന്നതിനിടെയാണ് പ്രഖ്യാപനമുണ്ടായിരിക്കുന്നത്.

റെജി സക്കറിയയുടെ പേരും പരിഗണനാ പട്ടികയിൽ എത്തിയെങ്കിലും സിപിഎം ഘടകങ്ങളുടെ പിന്തുണ പരിഗണിച്ച് ജെയ്കിനെ സ്ഥാനാർത്ഥിയാക്കുകയായിരുന്നു. എല്ലാ ഏരിയാ കമ്മിറ്റികളും ജെയ്കിന്റെ പേരാണ് ജില്ലാ കമ്മിറ്റിയ്‌ക്ക് നൽകിയത്. ജില്ലാ കമ്മിറ്റിയും ജെയ്കിന്റെ പേര് മാത്രമാണ് സംസ്ഥാന നേതൃത്വത്തിന് മുന്നിൽ വെച്ചത്. പിന്നാലെ ചേർന്ന സംസ്ഥാന സെക്രട്ടറിയേറ്റ് ജില്ലാ നേതൃത്വത്തിന്റെ നിർദ്ദേശം അംഗീകരിക്കുകയായിരുന്നു.

ഉമ്മൻ ചാണ്ടിയോട് മത്സരിച്ച് രണ്ട് തവണ പരാജയപ്പെട്ട ജെയ്ക്, ഇത് മൂന്നാം തവണയാണ് പുതുപ്പള്ളിയിൽ വീണ്ടും പരീക്ഷണത്തിനിറങ്ങുന്നത്. 2016 ലെ കന്നിയംഗത്തിലായിരുന്നു ജെയ്‌ക്ക് ആദ്യം പരാജയം നേരിട്ടത്. പിന്നീട് 2021 ൽ നടന്ന തിരഞ്ഞെടുപ്പിലും തോൽവി സമ്മതിച്ചു. എന്നാൽ രണ്ട് തവണ മത്സരിച്ചപ്പോഴും ഉമ്മൻചാണ്ടിയുടെ ഭൂരിപക്ഷം കുറയ്‌ക്കാൻ സാധിച്ചിട്ടുണ്ടെന്ന വിലയിരുത്തലിലാണ് ജെയ്‌ക്കിന് വീണ്ടും അവസരം നൽകാൻ സിപിഎം തീരുമാനമെടുത്തതെന്നാണ് വിവരം.