ശാർദൂലൻ തുടങ്ങിയ ചാരന്മാരെയും രാവണൻ രാമ സന്നിധിയിലേക്ക് അയച്ചു. അവരും പിടിക്കപ്പെട്ടു. എന്നാൽ ശ്രീരാമൻ ആ ചാരന്മാരോടും ക്ഷമിച്ച് വിട്ടയച്ചു. നാണക്കേടോടെ അവരും തിരിച്ചെത്തി. തുടർന്ന് രാവണൻ വിദ്വിജ്ജിഹ്വൻ എന്ന രാക്ഷസനെയും കൂട്ടി മായയാൽ നിർമ്മിച്ച ശ്രീരാമ ശിരസുമായി സീതാദേവിയുടെ അടുത്തുചെന്നു. ആ രാമ ശിരസ്സും കാട്ടി സീതയെ തകർക്കുകയായിരുന്നു ലക്ഷ്യം. സീതാദേവിക്ക് ചെറിയ രീതിയിൽ മാനസിക സമ്മർദ്ദം ഉണ്ടായി. രാവണൻ തിരിച്ചു പോയശേഷം വിഭീഷണ പുത്രി സരമ ഇതെല്ലാം രാക്ഷസമായ ആണെന്ന് സീതയെ ബോധ്യപ്പെടുത്തി..
ഇതിനിടെ വിഭീഷണൻ തന്റെ മന്ത്രിമാരായ അനലൻ, ശരഭൻ, സമ്പാതി, പ്രകാശൻ എന്നിവരെ യുദ്ധസന്നാഹ വിവരങ്ങൾ അറിയാൻ ചാരന്മാരായി അയച്ചു. അവർ കൃത്യം പൂർത്തിയാക്കി വിഭീഷണന്റെ സമീപം വന്ന് വിവരങ്ങൾ കൈമാറി.
രാവണന്റെ കിഴക്കേകോട്ടയിലെ നിയന്ത്രണം രാവണമന്ത്രി പ്രഹസ്തനാണ് തെക്കേകോട്ടയിൽ മഹാപാർശ്വനും മഹോദരനും നിയന്ത്രിക്കും. പടിഞ്ഞാറേ ഗോപുരം രാവണപുത്രൻ മേഘനാഥൻ നിയന്ത്രണ ചുമതല നോക്കും.വടക്കേ ഗോപുരത്തിൽ രാവണൻ നേരിട്ടാണ് നിയന്ത്രണം. മധ്യഭാഗത്തിന്റെ നിയന്ത്രണം വിരൂപാക്ഷനാണ്.
ഇതുകൂടി പരിഗണിച്ചാണ് വാനര സൈന്യത്തെ ചിട്ടപ്പെടുത്തിയത്. സർവ്വസൈന്യാധിപൻ നീലൻ കിഴക്കേ ഗോപുരത്തിങ്കൽ പ്രഹസ്തനെ നേരിടും. അംഗദന്റെ നേതൃത്വത്തിലുള്ള വിഭാഗം തെക്കേഗോപുരത്തിങ്കൽ ആക്രമിച്ചു കയറും. ഹനുമാൻ പശ്ചിമ ഗോപുരത്തിങ്കൽ മേഘനാഥനെയും കൂട്ടരെയും നേരിടും. വടക്കേ ഗോപുരത്തിങ്കൽ രാമലക്ഷ്മണന്മാരാണ് രാവണന് നേരിടുക. നടുഭാഗം കാക്കാൻ സുഗ്രീവനും ജാമ്പവാനും ഉണ്ടാകും. മനുഷ്യരൂപത്തിൽ രാമലക്ഷ്മണന്മാരും വിഭീഷണനും വിഭീഷണന്റെ നാലു മന്ത്രിമാരും മാത്രം.
എഴുതിയത്
എ പി ജയശങ്കർ
ഫോൺ : 9447213643
ശ്രീ എ പി ജയശങ്കർ എഴുതിയ രാമായണ തത്വ വിചാരത്തിന്റെ മറ്റു ഭാഗങ്ങൾ വായിക്കാൻ ഈ ലിങ്കിൽ ക്ലിക്ക് ചെയ്യുക
https://janamtv.com/tag/ramayana-thatwavicharam/
Comments