ശക്തനെത്തന്നെ ദൂതിനയക്കണം – രാമായണതത്വവിചാരം ഭാഗം 28

ഇനി ആരെയാണ് ദൂതിനയക്കുക. ശക്തനും വാഗ്വൈഭവം ഉള്ളവനുമായ ഒരു സമർത്ഥനെ തന്നെ വേണം നിയോഗിക്കാൻ.ഹനുമാനെ തന്നെ അയച്ചാലോ എന്ന വാനരന്മാരുടെ സംശയം ന്യായം. പക്ഷേ ഹനുമാനെ തന്നെ നിയോഗിച്ചാൽ നമുക്ക് വേറെ യോഗ്യന്മാർ ആരുമില്ലെന്ന് രാവണാദികൾ വിലയിരുത്തും. യുദ്ധത്തിൽ ഹനുമാനെ വളഞ്ഞിട്ട് ആക്രമിക്കാൻ അത് കാരണമാകും. താൻ തന്നെ പോയാലോ എന്നായി സുഗ്രീവൻ. അതുവേണ്ട രാജാവ് തന്നെ ദൂതനായി ചെന്നാൽ വാനര വംശത്തിന് തന്നെ പേര് ദോഷമാകും എന്ന് ശ്രീരാമൻ പറഞ്ഞു
ജാംബവാൻ ആണെങ്കിലോ.? അതും വേണ്ട ; ജാംബവാൻ നമുക്കെല്ലാവർക്കും ഗുരുസ്ഥാനിയനാണ്, ബ്രഹ്മപുത്രനാണ്, വാഗ്ദേവിയുടെ അനുഗ്രഹമുള്ള ഒരു ശക്തൻ തന്നെ. എന്നാൽ വാർദ്ധക്യം പരിഗണിക്കേണ്ടതല്ലേ.? എതിരാളികൾ കിളവൻ എന്ന് വിളിച്ച് ആക്ഷേപിക്കും.
സേനാ നായകൻ നീലൻ??വേണ്ട..!!!നീലൻ ദൂതന് പോയാൽ സൈന്യത്തെ ആര് നിയന്ത്രിക്കും. ഹനുമാന്റെ അച്ഛൻ കേസരി ആയാലോ..??വാർദ്ധക്യവിഷയം അദ്ദേഹത്തിനും ബാധകമാണ്.

ഞാൻ പോകാം ദൂതിന്…!!! യുവരാജാവ് അംഗദൻ ആത്മവിശ്വാസത്തോടെ പറഞ്ഞു. അംഗദൻ തുടർന്നു ; ഏത് വെല്ലുവിളികളെയും മറികടന്ന് കോട്ടകളും കിടങ്ങുകളും എല്ലാം ഭേദിച്ച് ഞാൻ രാവണനെ കണ്ട് ശ്രീരാമ സന്ദേശം അറിയിച്ച് തിരിച്ചുപോരും. ഞാൻ ബാലീപുത്രനാണ്. എന്റെ അച്ഛൻ പണ്ട് രാവണനെ പുല്ലുപോലെ ഗണിച്ച് വാലിൽ ചുറ്റികെട്ടി സപ്തസമുദ്രങ്ങളും ചാടിക്കടന്നതാണ്. ഒടുവിൽ അച്ഛനോട് ക്ഷമചോദിച്ച് രക്ഷപ്പെട്ടവനാണ് രാവണൻ. ശ്രീരാമൻ സമ്മതം മൂളി. വാഗ് ദേവതയുടെ അനുഗ്രഹമുള്ള ശക്തനും രാവണന് താക്കീത് നൽകാൻ യോഗ്യനുമാണ് അംഗദൻ. അതാകുമ്പോൾ രാവണന് ഒരു ഭയവും ഉണ്ടാകും..
ശ്രീരാമ നിയോഗമനുസരിച്ച് അംഗദൻ രാവണന്റ കൊട്ടാരത്തിൽ കടന്ന് ശ്രീരാമ സന്ദേശം അറിയിച്ച് സമാധാന ശ്രമം നടത്തി. അഹങ്കാരം മുത്തരാവണൻ അംഗദനെ ആക്രമിക്കാൻ പ്രഹസ്താദികളോട് നിർദ്ദേശിച്ചപ്പോൾ, അംഗദൻ ഒറ്റ ചാട്ടത്തിന് പ്രാസാദവും തകർത്ത് പുറത്തു വന്ന് ശ്രീരാമ സവിധത്തിൽ എത്തി.

എഴുതിയത്
എ പി ജയശങ്കർ
ഫോൺ : 9447213643
ശ്രീ എ പി ജയശങ്കർ എഴുതിയ രാമായണ തത്വ വിചാരത്തിന്റെ മറ്റു ഭാഗങ്ങൾ വായിക്കാൻ ഈ ലിങ്കിൽ ക്ലിക്ക് ചെയ്യുക
https://janamtv.com/tag/ramayana-thatwavicharam/