തിരുവനന്തപുരം; ഓണക്കാലം മുന്നിൽ കണ്ട് വിപുലമായ വിൽപ്പന ലക്ഷ്യമിട്ടിരിക്കുകയാണ് ബെവ്‌കോ. ഓണക്കാലത്ത് ജവാൻ റമ്മിന് പ്രത്യേക പരിഗണന നൽകണമെന്നാണ് ബെവ്‌കോ എംഡിയുടെ നിർദ്ദേശം. ഓരോ ഔട്ടിലെറ്റിലും ജവാൻ റമ്മിന്റെ ലഭ്യതയും വിൽപ്പനയും ഉറപ്പുവരുത്തണമെന്നും പ്രത്യേക ബ്രാൻഡ് ആവശ്യമില്ലാത്തവർക്ക് ജവാൻ നൽകണമെന്നുമാണ് നിർദ്ദേശം. എന്നാൽ മറ്റു ബ്രാൻഡുകൾക്ക് പ്രത്യേക പരിഗണന കൊടുക്കേണ്ടതില്ലെന്നും നിർദ്ദേശമുണ്ട്.
അതേസമയം എല്ലാ ഔട്ട്‌ലെറ്റിലും വെയർ ഹൗസിലും മദ്യത്തിന്റെ സ്റ്റോക്ക്, വെയർ ഹൗസ് മാനേജർമാരും ഷോപ്പിന്റെ ചുമതലയുള്ളവരും ഉറപ്പുവരുത്തണമെന്നും വില കുറഞ്ഞ മദ്യം ഉൾപ്പെടെയുള്ളവ സ്റ്റോക്ക് ചെയ്യാനും ഔട്ടലെറ്റുകൾക്ക് നിർദ്ദേശം ലഭിച്ചിട്ടുണ്ട്. 25-ന് വൈകുന്നേരം കിട്ടിയ പണം മുഴുവൻ ബാങ്കുകളിൽ നിക്ഷേപിക്കാനും തീരുമാനമായിട്ടുണ്ട്. പിന്നീടുള്ള ദിവസങ്ങളിൽ ബാങ്ക് അവധിയായതിനാൽ പണം ഔട്ട്‌ലെറ്റുകളിൽ സുരക്ഷാ ക്രമീകരണങ്ങളോടെ എടുത്തുവെക്കാനുമാണ് തീരുമാനം. ഏറ്റവും കൂടുതൽ ഡിജിറ്റൽ പേയ്‌മെന്റുകൾ നടത്തിയ ഔട്ട്‌ലെറ്റുകൾക്ക് സമ്മാനങ്ങൾ നൽകുമെന്നും എംഡി പറഞ്ഞു. ഓണക്കാലം മുന്നിൽ കണ്ട് ജീവനകാരുടെ അവധിയിലും പരിധി ഏർപ്പെടുത്തിയിട്ടുണ്ട്.
Comments