തിരുവനന്തപുരം: ശ്രീപദ്മാനഭന്റെ ചിത്രം ആലേഖനം ചെയ്ത് പൂജിച്ച സ്വർണനാണയങ്ങൾ പുറത്തിറക്കി ക്ഷേത്രം. പദ്മാനഭസ്വാമി ക്ഷേത്രത്തിന്റെ കിഴക്കേ നടയിൽ നടന്ന ചടങ്ങിലാണ് സ്വർണനാണയം പുറത്തിറക്കിയത്. ക്ഷേത്രം എക്‌സിക്യൂട്ടീവ് ഓഫീസർ ബി മഹേഷ് ഭരണസമിതി അംഗം ആദിത്യവർമ്മയ്‌ക്ക് സ്വർണനാണയം നൽകിയായിരുന്നു പുറത്തിറക്കിയത്. ക്ഷേത്രം മാനേജർ ബി ശ്രീകുമാർ, ഓഡിറ്റ് ആൻഡ് ഫിനാൻസ് ഓഫീസർ വെങ്കിട സുബ്രഹ്‌മണ്യം, ക്ഷേത്ര ശ്രീകാര്യം അനന്തരാമൻ എന്നിവർ ചടങ്ങിൽ പങ്കെടുത്തു.
ഒരു ഗ്രാം, രണ്ട് ഗ്രാം, നാല് ഗ്രാം, എട്ട് ഗ്രാം എന്നിങ്ങനെ തൂക്കത്തിൽ പണി കഴിപ്പിച്ച നാണയങ്ങളാകും ഭക്തർക്ക് നൽകുന്നത്. ക്ഷേത്രത്തിൽ നടവരയായി ലഭിച്ച സ്വർണാഭരണങ്ങൾ ഉരുക്കിയാണ് നാണയങ്ങളുടെ നിർമ്മാണം. വളരെ കുറച്ച് നാണയങ്ങൾ മാത്രമാകും വിൽപ്പനയ്‌ക്ക് ഉണ്ടാകുകയെന്ന് അധികൃതർ അറിയിച്ചു. സ്വർണത്തിന്റെ പ്രതിദിന വിപണി വിലയെ ആശ്രയിച്ചാകും നാണയത്തിന്റെ വില നിശ്ചയിക്കുന്നത്. നാണയങ്ങൾ ലഭിക്കുന്നതിനായി ക്ഷേത്ര കൗണ്ടറുകളിലൂടെ പണം അടയ്‌ക്കുകയാണ് ചെയ്യേണ്ടത്.
Comments