ജനം ടിവിയുടെ ആരോഗ്യ കീർത്തി പുരസ്‌കാരങ്ങൾ സമ്മാനിച്ചു

തിരുവനന്തപുരം: ആരോഗ്യ മേഖലയിലെ സമഗ്ര സംഭാവനയ്‌ക്കായി ജനം ടിവി ഏർപ്പെടുത്തിയ ആരോഗ്യ കീർത്തി പുരസ്‌കാരങ്ങൾ സമ്മാനിച്ചു. തിരുവനന്തപുരത്ത് നടന്ന ചടങ്ങ് കേന്ദ്ര വിദേശകാര്യ സഹമന്ത്രി വി മുരളീധരൻ ഉദ്ഘാടനം ചെയ്തു. വ്യക്തി നിർമാണത്തിലൂടെ രാഷ്‌ട്ര പുനർനിർമാണം എന്ന ആപ്തവാക്യത്തിലൂന്നിയാണ് ജനം ടി വി ആരോഗ്യ രംഗത്ത് വ്യക്തിമുദ്ര പതിപ്പിച്ച ആളുകളെയും സ്ഥാപനങ്ങളെയും പുരസ്‌കാരം നൽകി ആദരിച്ചത്.

കോവിഡ് കാലത്ത് താങ്ങായി നിന്ന ആരോഗ്യ മേഖലയിലെ ആരോഗ്യപ്രവർത്തകരെ അഭിനന്ദിച്ച കേന്ദ്രമന്ത്രി കേന്ദ്രസർക്കാരിന് ആരോഗ്യമേഖലയിൽ പ്രവർത്തിക്കുന്നവരോടുളള കടപ്പാടും വേദിയിൽ പ്രകടിപ്പിച്ചു. തിരുവനന്തപുരം അനന്തപുരി ഹോസ്പിറ്റൽ എം ഡി ഡോ. മാർത്താണ്ഡൻ പിള്ള, എസ് യു ടി ഹോസ്പിറ്റൽ സി ഇ ഓ രാജീവ് മണാലി, നൈൽ ഹോസ്പിറ്റൽ എം ഡി ഡോ.അലോക്, എസ് കെ ഹോസ്പിറ്റൽ എം ഡി ശിവൻകുട്ടി, ഗായത്രി ആയുർവേദ ഹോസ്പിറ്റൽ എം ഡി ഡോ.സജി, സഞ്ജീവനി ആയുർവേദ ഹോസ്പിറ്റൽ എം ഡി ഡോ. രഞ്ജിത്ത്, സിയുആർവി ഹോസ്പിറ്റൽ എം ഡി ഡോ. കെവി വിനോദ്, ഡോ. ജയചന്ദ്രൻ- മൗലാനാ ഹോസ്പിറ്റൽ, എസ് കെ വി എ ഹോസ്പിറ്റൽ എം ഡി ഡോ. രാജഗോപാല കൃഷ്ണൻ, ആൽഫാ ഹീൽ സ്‌കിൻ കെയർ ക്ലിനിക്ക് എംഡി ജീന എന്നിവർക്കാണ് ആരോഗ്യ കീർത്തി പുരസ്‌കാരങ്ങൾ സമ്മാനിച്ചത്.

കോവിഡ് സമയത്ത് വീടിനുള്ളിൽ കുടുങ്ങിപ്പോയപ്പോഴാണ് ആരോഗ്യപ്രവർത്തകരുടെയും ഡോക്ടർമാരുടെയും വില നാം മനസിലാക്കിയതെന്നും ആതുരസേവന രംഗത്തെ അത്തരം ആളുകളെ ആദരിക്കാൻ മുൻകൈയെടുത്ത ജനം ടി വി അഭിനന്ദനം അര്ഹക്കുന്നതായും മുഖ്യഭാഷണം നടത്തിയ കേസരി പത്രാധിപർ ഡോ. എൻ ആർ മധു പറഞ്ഞു.

ചടങ്ങിൽ ജനം ടിവി ചീഫ് ഓപ്പറേറ്റിങ് ഓഫീസർ ഗിരീഷ് സി മേനോൻ, ജനം ടിവി പ്രോഗ്രാം ഹെഡ് തിരൂർ രവീന്ദ്രൻ, സേവാഭാരതി സംസ്ഥാന അധ്യക്ഷൻ ഡോ. രഞ്ജിത്ത് ഹരി, ജനം ടി വി ഡയറക്ടർ രാജൻ പോയിലക്കട, ഡെപ്യുട്ടി കോർഡിനേറ്റിങ് എഡിറ്റർ സി ജി ഉമേഷ്, ചലച്ചിത്ര താരം ദിനേശ് പണിക്കർ, ജനം ടി വി കോർഡിനേറ്റിങ് എഡിറ്റർ ആർ രാജീവ്, ആരോഗ്യമേഖലയിലെ മറ്റ് പ്രമുഖ വ്യക്തിത്വങ്ങൾ തുടങ്ങിയവർ ചടങ്ങിൽ പങ്കാളികളായി.