അണിഞ്ഞൊരുങ്ങി തലസ്ഥാനം; ഓണാഘോഷങ്ങ ഒരുക്കങ്ങൾ അവസാന ഘട്ടത്തിലേക്ക്

തിരുവനന്തപുരം: തലസ്ഥാനത്ത് സംഘടിപ്പിക്കുന്ന ഓണം വാരാഘോഷത്തിന്റെ ഒരുക്കങ്ങൾ അവസാനഘട്ടത്തിലേക്ക്. വിനോദസഞ്ചാര വകുപ്പിന്റെ നേതൃത്വത്തിൽ സംസ്ഥാന സർക്കാരിന്റെ ഓണാഘോഷ പരിപാടികൾ ഓഗസ്റ്റ് 27 മുതൽ സെപ്റ്റംബർ രണ്ട് വരെയാണ് നടക്കുക. ഓണം ഒരുമയുടെ ഈണം എന്ന പ്രമേയത്തിൽ നടക്കുന്ന വാരാഘോഷത്തിന്റെ ഉദ്ഘാടനം ഓഗസ്റ്റ് 27-ന് നടക്കും. വൈകിട്ട് ആറ് മണിക്ക് നിശാഗന്ധിയിൽ മുഖ്യമന്ത്രി പിണറായി വിജയൻ ചടങ്ങിന്റെ ഉദ്ഘാടനം നിർവഹിക്കും. ചടങ്ങിൽ നടൻ ഫഹദ് ഫാസിലും നർത്തകി മല്ലിക സാരാഭായിയും മുഖ്യാതിഥികളായി പങ്കെടുക്കും.

സംസ്ഥാന സ്‌കൂൾ കലോത്സവത്തിലെ ഒന്നാം സ്ഥാനക്കാരായ പട്ടാമ്പി പെരിങ്ങോട് സ്‌കൂളിലെ വിദ്യാർത്ഥികൾ അവതരിപ്പിക്കുന്ന പഞ്ചവാദ്യമേളം ഓണാഘോഷ പരിപാടികളുടെ മാറ്റുകൂട്ടും. കൂടാതെ കലാമണ്ഡലത്തിലെ നർത്തകർ അവതരിപ്പിക്കുന്ന നൃത്തശിൽപ്പവും പരിപാടിയെ കൂടുതൽ ഗംഭീരമാക്കും. ജില്ലയിൽ വിവിധ ഇടങ്ങളിലായി 30 വേദികളിൽ എണ്ണായിരത്തിലധികം കലാകാരന്മാർ ഈ ദിവസങ്ങളിലായി വിവിധ കലാപരിപാടികൾ അവതരിപ്പിക്കും.

ഇവയിൽ പ്രധാന വേദിയകളായ കനകക്കുന്ന്, സെൻട്രൽ സ്റ്റേഡിയം, പൂജപ്പുര, തൈക്കാട്, കാര്യവട്ടം ഗ്രീൻഫീൽഡ് സ്റ്റേഡിയം എന്നിവിടങ്ങളിൽ ഒരുക്കങ്ങൾ അവസാന ഘട്ടത്തിലാണ്. ഓണാഘോഷങ്ങളുടെ ഭാഗമായി ഒരുക്കിയിരിക്കുന്ന ലേസർ ഷോ കൂടുതൽ വിസ്മയം തീർക്കും. കഴിഞ്ഞ രണ്ട് വർഷങ്ങളിലും തയാറാക്കിയ വെർച്വൽ പൂക്കളം ഇത്തവണയും ഉണ്ടാകും. കവടിയാർ മുതൽ മണക്കാട്, ശാസ്തമംഗലം എന്നിവിടങ്ങൾ വരെയും ഇല്യുൂമിനേഷൻ ലൈറ്റുകളാൽ ഭംഗിയാക്കും. ഓഗസ്റ്റ് 26-ന് വൈകിട്ട് ഇതിന്റെ സ്വിച്ച് ഓൺ കർമ്മം നടക്കും.