ആറന്മുള ഭഗവാന് ഓണ വിഭവങ്ങളുമായി തിരുവോണത്തോണിയേറാൻ യാത്ര തിരിച്ച് മങ്ങാട്ട് ഭട്ടതിരി

പത്തനംതിട്ട: ആറന്മുള ഭഗവാന് ഓണ വിഭവങ്ങളുമായി തിരുവോണത്തോണിയേറാൻ മങ്ങാട്ട് ഭട്ടതിരി യാത്ര തിരിച്ചു. രവീന്ദ്ര ബാബു ഭട്ടതിരിയാണ് ഇത്തവണയും യാത്ര നടത്തുന്നത്. തിരുവോണനാളിൽ പുലർച്ചെ തിരുവോണത്തോണി ആറന്മുളയിലെത്തും.

കോട്ടയം കുമാരനെല്ലൂരിൽ മങ്ങാട്ട് തറവാട്ടിലെ തേവാരപ്പുരയിൽ ആചാരപ്രകാരമുള്ള പൂജയ്‌ക്കും ദീപാരാധനയ്‌ക്കും ശേഷമായിരുന്നു യാത്ര. 12 മണിയോടെ ചുരുളൻ അകമ്പടി വള്ളത്തിൽ അവകാശിയായ മൂത്ത കാരണവർ രവീന്ദ്ര ബാബു ഭട്ടതിരി യാത്ര തിരിച്ചു. ഇത് നാലാം തവണയാണ് രവീന്ദ്ര ബാബു ഭട്ടതിരി ആറന്മുളയിലേക്ക് ഓണ വിഭവങ്ങൾ സമർപ്പിക്കാൻ യാത്ര തിരിക്കുന്നത്.

ബിജെപി സംസ്ഥാന അദ്ധ്യക്ഷൻ കെ.സുരേന്ദ്രൻ, തിരുവഞ്ചൂർ രാധാകൃഷ്ണൻ എംഎൽഎ എന്നിവർ ചടങ്ങിൽ സന്നിഹിതരായിരുന്നു. ഉത്രാട സന്ധ്യയിൽ കാട്ടൂർ മഹാവിഷ്ണു ക്ഷേത്രത്തിൽ നിന്നും 18 വീട്ടുകാരും നാട്ടുകാരും ചേർന്ന് തയ്യാറാക്കിയ ഓണ വിഭവങ്ങളുമായി യാത്ര തുടരുന്ന തിരുവോണത്തോണി പുലർച്ചെ ആറന്മുള ക്ഷേത്രത്തിൽ എത്തും.