ദേശീയ അദ്ധ്യാപക പുരസ്‌കാര ദാനം സെപ്റ്റംബർ 5-ന് ; 75 അദ്ധ്യാപകർക്ക് രാഷ്‌ട്രപതി അവാർഡ് സമ്മാനിക്കും

ന്യൂഡൽഹി: 2023-ലെ ദേശീയ അദ്ധ്യാപക പുരസ്‌കാര ദാനം സെപ്റ്റംബർ അഞ്ചിന്. തിരഞ്ഞെടുത്ത 75 അദ്ധ്യാപകർക്കാണ് രാഷ്‌ട്രപതി അവാർഡ് സമ്മാനിക്കുന്നത്. ഡൽഹിയിലെ വിജ്ഞാൻ ഭവനിലാണ് അവാർഡ് ദാന ചടങ്ങ് നടക്കുക.

ഇന്ത്യയുടെ മുൻ രാഷ്‌ട്രപതി സർവേപ്പള്ളി രാധാകൃഷ്ണന്റെ ജന്മദിനമായ സെപ്റ്റംബർ അഞ്ചാണ് ദേശീയ അദ്ധ്യാപക ദിനമായി രാജ്യം ആഘോഷിക്കുന്നത്. അർപ്പണബോധത്തിലൂടെയും പ്രയത്‌നത്തിലൂടെയും വിദ്യാഭ്യാസ നിലവാരം ഉയർത്തുകയും വിദ്യാർത്ഥികളുടെ ജീവിതം മെച്ചപ്പെടുത്തുക ചെയ്ത മികച്ച അദ്ധ്യാപകരെ ആദരിക്കുക എന്നതാണ് ദേശീയ അദ്ധ്യാപക അവാർഡിലൂടെ ലക്ഷ്യം വെയ്‌ക്കുന്നത്.

സർട്ടിഫിക്കറ്റും 50,000 രൂപ ക്യാഷ് അവാർഡും വെള്ളി മെഡലും അടങ്ങുന്നതാണ് അവാർഡ്. അവാർഡ് ജേതാക്കളായ അദ്ധ്യാപകർക്ക് പ്രധാനമന്ത്രിയുമായി സംവദിക്കാനുള്ള അവസരവും ലഭിക്കും. 50 സ്‌കൂൾ അദ്ധ്യാപകർ, ഉന്നത വിദ്യാഭ്യാസ വിഭാഗത്തിലെ 13 അദ്ധ്യാപകർ, വികസന-സംരംഭകത്വ മന്ത്രാലയത്തിലെ 12 അദ്ധ്യാപകർ എന്നിവരാണ് ഈ വർഷത്തെ ദേശീയ അദ്ധ്യാപക പുസ്‌കാരത്തിന് അർഹരായത്.