ബിരുദമുണ്ടോ? എസ്ബിഐ ക്ഷണിക്കുന്നു; കേരളത്തിൽ 424 ഒഴിവുകൾ

ബിരുദധാരികളെ ക്ഷണിച്ച് സ്റ്റേറ്റ് ബാങ്ക് ഓഫ് ഇന്ത്യ. അപ്രന്റിസ് തസ്തികയിലേക്കുള്ള റിക്രൂട്ട്മെന്റിനുള്ള വിജ്ഞാപനം പുറത്തിറക്കി. 6160 തസ്തികകളിലേക്കാണ് നിയമനം. കേരളത്തിൽ 424 ഒഴിവുകളുണ്ട്. സെപ്റ്റംബർ ഒന്ന് മുതൽ സെപ്റ്റംബർ 21 വരെ അപേക്ഷിക്കാം. അംഗീകൃത സർവകലാശാല ബിരുദമാണ് യോഗ്യത. ഒക്ടോബർ അല്ലെങ്കിൽ നവംബർ മാസങ്ങളിലാകും എഴുത്തുപരീക്ഷ.

എസ്ബിഐയുടെ ഔദ്യോഗിക വെബ്സൈറ്റായ സന്ദർശിച്ച് കരിയർ ലിങ്കിൽ ക്ലിക്ക് ചെയ്യുക. തുടർന്ന് തുറന്നുവരുന്ന പുതിയ പേജിൽ എസ്ബിഐ അപ്രന്റിസ് അപേക്ഷ ഓൺലൈൻ ലിങ്കിൽ ക്ലിക്ക് ചെയ്യുക. രജിസ്റ്റർ ചെയ്ത് അക്കൗണ്ടിൽ ലോഗിൻ ചെയ്യുക. അപേക്ഷാ ഫോം പൂരിപ്പിച്ച് അപേക്ഷാ ഫീസ് അടയ്‌ക്കുക.തുടർന്ന് സബ്മിറ്റ് ചെയ്ത് പേജ് ഡൗൺലോഡ് ചെയ്യുക. ഇതിന്റെ കോപ്പി സൂക്ഷിച്ച് വെക്കുക. ജനറൽ/ ഒബിസി/ ഇഡബ്ല്യുഎസ് വിഭാഗത്തിൽ നിന്നുള്ള ഉദ്യോഗാർത്ഥികൾക്ക് അപേക്ഷാ ഫീസ് 300 രൂപയാണ്. എസ്‌സി/എസ്ടി/പിഡബ്ല്യുബിഡി വിഭാഗം ഉദ്യോഗാർഥികളെ ഫീസിൽ നിന്ന് ഒഴിവാക്കിയിട്ടുണ്ട്.

പ്രാദേശിക ഭാഷാ പരീക്ഷയും ഓൺലൈൻ എഴുത്തുപരീക്ഷയും അടിസ്ഥാനപ്പെടുത്തിയായിരിക്കും തിരഞ്ഞെടുപ്പ് നടത്തുന്നത്. ഒരു മണിക്കൂർ ദൈർഘ്യമുള്ള എഴുത്തുപരീക്ഷയിൽ 100 ചോദ്യങ്ങളാണുള്ളത്.പരമാവധി മാർക്ക് 100 ആണ്. ജനറൽ ഇംഗ്ലീഷ് പരീക്ഷ ഒഴികെ, എഴുത്ത് പരീക്ഷയ്‌ക്കുള്ള ചോദ്യങ്ങൾ 13 പ്രാദേശിക ഭാഷകളിൽ ഉണ്ടാകും. ഇംഗ്ലീഷ്, ഹിന്ദി ഭാഷകൾക്ക് പുറമെ അസമീസ്, ബംഗാളി, ഗുജറാത്തി, കന്നഡ, കൊങ്കണി, മലയാളം, മണിപ്പൂരി, മറാത്തി, ഒറിയ, പഞ്ചാബി, തമിഴ്, തെലുങ്ക്, ഉറുദു ഭാഷകളിൽ ചോദ്യങ്ങൾ ലഭ്യമാക്കും. രജിസ്‌ട്രേഷനും മറ്റ് വിവരങ്ങൾക്കുമായി sbi.co.in എന്ന വെബ്‌സൈറ്റ് സന്ദർശിക്കുക.